لاہور(سٹاف رپورٹر)پاکستان تحریک انصاف(پی ٹی آئی )نے وزیراعلیٰ پنجاب چوہدری پرویز الٰہی کے اعتماد کا ووٹ حاصل کرنے کے لئے پارٹی کی حکمت عملی طے کر لی ہے جبکہ چیئرمین تحریک انصاف اور سابق وزیر اعظم عمران خان کا کہنا ہے امپورٹڈ ٹولے کو الیکشن سے بھاگنے نہیں دیں گے،دوسری طرف پی ٹی آئی اجلاس کی اندرونی کہانی بھی سامنے آ گئی ہے۔
’پاکستان ٹائم ‘ کے مطابق سابق وزیر اعظم عمران خان کی زیر صدارت سیاسی صورتحال پر اہم ترین اجلاس ہوا،زمان پارک میں ہونے والے اجلاس میں تحریک انصاف کی سینئر پارٹی قیادت کے علاوہ سپیکر سبطین خان،صوبائی وزراء میاں اسلم اقبال،ہاشم ڈوگر اور راجہ بشارت،ڈاکٹر یاسمین راشد،سردار حسنین بہادر دریشک اور خیال کاسترو سمیت ارکان صوبائی اسمبلی نے شرکت کی۔اجلاس کے دوران پنجاب کی سیاسی صورتحال خاص طور پر وزیر اعلیٰ پنجاب چودھری پرویز الہٰی کے اعتماد کے ووٹ پر تفصیلی مشاورت کی گئی،اس موقع پر چیئرمین پی ٹی آئی عمران خان نے سینئر قیادت کو اسمبلی میں اعتماد کے ووٹ اور آئندہ الیکشن کے حوالے سے تیاریوں کی ہدایت کی۔سابق وزیر اعظم نے کہا کہ امپورٹڈ ٹولے کو الیکشن سے بھاگنے نہیں دیں گے،سازشی ٹولہ اسلام آباد کے بعد کراچی کے بلدیاتی الیکشن سے بھی بھاگنے کی کوشش کر رہا ہے،انہیں معلوم ہے کہ عوام نے انہیں مکمل طور پر مسترد کر دیا ہے۔چیئرمین تحریک انصاف عمران خان نے مزید کہا کہ اسمبلی میں اعتماد کے ووٹ کے بعد ہم الیکشن کے لیے عوام کے پاس جائیں گے،ملک کے مسائل کا حل نئے الیکشن اور عوامی مینڈیٹ سے آنے والی حکومت ہی دے سکتی ہے۔دوسری طرف عمران خان کی زیر صدارت ہونے والے پنجاب کے صوبائی وزراء اجلاس کی اندرونی کہانی سامنے آگئی۔ذرائع کے مطابق اجلاس میں عمران خان نے اعتماد کا ووٹ عدالتی فیصلے سے مشروط کرتے ہوئے کہا کہ اگر عدالت نے کہا تو ہم اعتماد کا ووٹ لیں گے،البتہ ہمیں اعتماد کے ووٹ کے لئے تیاری کرنی ہے۔ذرائع کا کہنا ہے کہ عمران خان نے وزراء کو اراکین اسمبلی کے ساتھ رابطے میں رہنے کی بھی ہدایت کردی جس پر وزراء نے پارٹی چیئرمین کو یقین دہانی کرائی کہ اعتماد کا ووٹ لینا پڑا تو ہمیں مسئلہ نہیں ہوگا۔پی ٹی آئی اجلاس میں فیصلہ ہوا کہ اعتماد کا ووٹ لیتے ہی فوری اسمبلی تحلیل کردی جائے،اس موقع پر عمران خان نے کہا کہ ہم اسمبلی تحلیل کریں گے اس پر کوئی دو رائے نہیں اور ووٹنگ کے بعد کے ہم الیکشن کے لئے عوام کے پاس جائیں گے۔سابق وزیر اعظم نے وزراء کو اپنے حلقوں اور ڈویژنز میں اگلے انتخابات کی تیاری کرنے کی ہدایت دیتے ہوئے کہا کہ امپورٹڈ ٹولے کو الیکشن سے بھاگنے نہیں دیں گے،سازشی ٹولہ کراچی کے بلدیاتی الیکشن سے بھی بھاگنے کی کوشش کر رہا ہے۔
