کراچی(سٹاف رپورٹر)بڑے بڑے بجلی کے بلوں سے پریشان کراچی کے شہریوں کیلئے خوشخبری آگئی،نیپرا نے اہلیان کراچی کے لئے فیول ایڈجسٹمنٹ کی مد میں بجلی 7 روپے 43 پیسے فی یونٹ سستی کردی ہے۔
’پاکستان ٹائم‘ کے مطابق کراچی والوں کے لئے اچھی خبر ہے کیوں کہ نیپرا نے کے الیکٹرک صارفین کے لیے فیول ایڈجسٹمنٹ کی مد میں بجلی 7 روپے 43 پیسے فی یونٹ سستی کردی ہے۔نیپرا نے بجلی کی قیمتوں میں کمی کا نوٹیفکیشن بھی جاری کردیا ہے،جس کے مطابق بجلی کی قیمت میں کمی نومبر کے فیول ایڈجسٹمنٹ کی مد میں کی گئی ہے۔
نوٹیفکیشن کے مطابق کے الیکٹرک نے نیپرا میں 7 روپے 4 پیسے فی یونٹ کمی کی درخواست کی تھی،اتھارٹی نے 27 دسمبر 2022 کو ایف سی اے پر عوامی سماعت کی تھی۔نوٹیفکیشن کے مطابق کے الیکٹرک صارفین سے اکتوبر کا ایف سی اے 2 روپے 45 پیسے فی یونٹ کمی کے ساتھ چارج کیا گیا تھا اور نومبر کا ایف سی اے اکتوبر کی نسبت صارفین سے 4 روپے 98 پیسے مزید کم چارج کیا جائے گا۔
نوٹیفکیشن میں مزید بتایا گیا ہے کہ بجلی کی قیمت میں کمی کا اطلاق صرف 1 ماہ کے لیے ہوگا اور اس کا اطلاق لائف لائن صارفین، 300 یونٹس تک استعمال کرنے والے گھریلو صارفین،زرعی صارفین اور الیکٹرک وہیکل چارجنگ سٹیشنز پر نہیں ہوگا۔