اسلام آباد(سٹاف رپورٹر)پاکستان علماءکونسل کے سربراہ اوروزیراعظم کے معاون خصوصی علامہ طاہرمحمود اشرفی نے کہا ہے کہ جنیوا کانفرنس میں پاکستان کو بہت بڑی کامیابی ملی، ملک کے ڈیفالٹ کی افواہیں پھیلانے والے ناکام ہوئے،عمران خان کو انتخابات میں پتا چل جائے گا کہ عوام کس کے ساتھ ہیں ؟۔
اسلام آباد میں پریس کانفرنس کے دوران علامہ طاہراشرفی نے کہا کہ عالمی برادری نے مشکل وقت میں پاکستان کی مدد کی۔ جنیوا کانفرنس میں بڑی کامیابی عالمی دنیا کا پاکستان کی موجودہ قیادت پراعتماد کا اظہار ہے،موجودہ حالات میں جنیوا کانفرنس میں پاکستان کو بہت بڑی کامیابی ملی، عالمی برادری نے مشکل وقت میں پاکستان کی مدد کی، یہ عالمی دنیا کا موجودہ قیادت پر اعتماد کا اظہار ہے۔ عالمی برادری بالخصوص اسلامی عرب ممالک کا شکریہ ادا کرتے ہیں، ہمیں تمام تر اختلافات بھلا کر ملک کو مضبوط کرنا ہے۔علامہ طاہر اشرفی کا کہنا تھا کہ عمران خان کہتے ہیں کہ شہباز شریف مانگنے گئے ، کیا عمران صاحب اپنے دورمیں مانگنے نہیں جاتے تھے؟عمران خان اپنی ضد اورانا سے نکل کرملک وقوم کا سوچیں، حوصلہ رکھیں انتخابات آئے تو پتا چل جائے گا کہ عوام کس کے ساتھ ہیں۔انہوں نے کہا کہ جو لوگ پاکستان کے ڈیفالٹ ہونے کی افواہیں پھیلا رہے تھے ان کو ناکامی کا سامنا کرنا پڑا، اس سوچ سے باہر نکل کر ملک و قوم کا سوچنا ہو گا۔
