لاہور(وقائع نگارخصوصی)پاکستان تحریک انصاف کے مرکزی رہنما اور سابق وفاقی وزیر اطلاعات چوہدری فواد حسین نے کہا ہے کہ اسمبلیاں توڑنے میں اب کوئی قدغن نہیں رہ گئی، پرویز الٰہی کی رائے کا احترام ہے لیکن وہ خود کہہ چکے ہیں حتمی فیصلہ عمران خان کا ہوگا۔
’پاکستان ٹائم‘ کے مطابق لاہورہائیکورٹ کی جانب سے وزیر اعلیٰ کو ڈی نوٹیفائی کرنے کے خلاف درخواست نمٹائے جانے کے بعد خصوصی گفتگو کرتے ہوئے فواد چوہدری نے کہا کہ آج ہی اسمبلیاں تحلیل ہوجانا چاہئیں،آج پارٹی کی کی سینئیرقیادت کا مشاورتی اجلاس ہے جبکہ عمران خان پرویزالٰہی سے بھی ملاقات کریں گے، اب کوئی قدغن نہیں رہ گئی تو پنجاب اور خیبرپختونخوا اسمبلیاں تحلیل کردی جائیںگی۔وزیراعلیٰ چوہدری پرویز الٰہی کی جانب سے اسمبلی تحلیل نہ کرنے کی خواہش سے متعلق سوال پرفواد چوہدری نے کہا کہ پرویز الٰہی کا موقف ہے کہ اسمبلیاں 2 ، 3 ماہ اور چل جائیں ، ہمیں ان کی رائے کااحترام ہے لیکن ساتھ ہی انہوں نے یہ بھی کہا تھاکہ فیصلہ عمران خان نے کرنا ہے جو وہ (عمران خان) کرچکے ہیں۔
اپنے لیے راناثناءاور عطاءاللہ تارڑ کی جانب سے دن میں تارے دکھا دیے جانے کی بات پر فواد چوہدری نے کہا کہ ثابت ہوگیا نمبرز پورے تھے ، اب اس پرکیا بات کریں؟ افسوس ہے ان کیلئے آئین کی کوئی حیثیت نہیں رہ گئی، اگر کسی ملک کا وزیرداخلہ یہ کہے کہ ارکان کی جیو فینسنگ کروائی ہوئی ہے، ٹریول ریکارڈ نکالا ہے تو انہیں فوراً جیل بھیج دینا چاہیے، کسی مہذب ملک میں اس طرح کی بات نہیں کی جاتی، یہ بدترین دور ہے اور اب ان کے اختتام کا وقت قریب آگیا ہے، آج اسمبلیوں کی تحلیل کی جانب بڑھیں گے۔
