دبئی(بیورو رپورٹ)وزیر اعظم شہباز شریف کے دورہ متحدہ عرب امارات(یو اے ای) کا مشترکہ اعلامیہ جاری کردیا گیا۔وزیراعظم اور یو اے ای کے صدر کی ملاقات میں سیاسی،دفاعی،معاشی،تجارتی وثقافتی شعبوں میں باہمی تعاون بڑھانے پر بھی غور کیا گیا۔
مشترکہ اعلامیے کے مطابق وزیر اعظم نے 12اور 13 جنوری کو اماراتی صدر کی دعوت پر 2 روزہ متحدہ عرب امارات کا سرکاری دورہ کیا،عہدہ سنبھالنے کے بعد وزیر اعظم کا یہ تیسرا دورہ تھا،وزیر اعظم کو صدارتی محل آمد پر گارڈ آف آنر پیش کیا گیا۔وزیر اعظم شہباز شریف نے دورے کے دوران اماراتی صدر شیخ محمد بن زید النہیان سے دوطرفہ ملاقات کی جس میں دونوں رہنماوں نے دوطرفہ تعلقات کو مضبوط بنانے کے لئے تبادلہ خیال کیا،ملاقات میں سیاسی،دفاعی، اقتصادی،تجارتی اور ثقافتی شعبوں میں تعاون بڑھانے،مشترکہ منصوبوں کو فروغ دینے اور انسانی وسائل کے شعبے میں تعاون کو مضبوط بنانے کے لئے مخصوص اقدام پر بات چیت کی۔
وزیر اعظم نے سیلاب متاثرین کے لئے متحدہ عرب امارات کی مدد پراماراتی صدرکا شکریہ ادا کیا،دونوں رہنماوں نے سٹریٹجک شراکت داری اور تعاون کو مضبوط بنانے کے لئے مشاورت اور تعاون کو تیز کرنے پر اتفاق کیا۔ملاقات میں انفارمیشن اور کمیونیکیشن ٹیکنالوجی کے شعبے میں اور ڈیجیٹل تقسیم کو ختم کرنے کے لئے مل کر کام کرنے پر اتفاق کیا گیا۔پاکستان اور متحدہ عرب امارات نے اپنے تاریخی اور برادرانہ تعلقات کا اعادہ کیا،دونوں فریقوں نے انسانی سمگلنگ سے نمٹنے،معلومات کے تبادلے اور سفارتی اکیڈمیوں کے درمیان مفاہمت کی یادداشت پر دستخط کیے جبکہ وزیر اعظم نے اماراتی صدر کو دورہ پاکستان کی دعوت دی۔
