لاہور(سٹاف رپورٹر)سابق وزیراعظم اور چیئرمین پاکستان تحریک انصاف (پی ٹی آئی) عمران خان نے قومی اسمبلی میں واپسی کے لئے ایک اور شرط رکھتے ہوئے کہا ہے کہ پارلیمنٹ میں نگراں سیٹ اپ کے لئے واپس جا سکتے ہیں، مجھے یقین ہے مارچ اپریل میں الیکشن ہو جائیں گے، ن لیگ کے ایم این اے رابطے میں ہیں، شہباز شریف کی نیندیں حرام کرنے والے ہیں۔
’پاکستان ٹائم ‘کے مطابق لاہور میں سینئر صحافیوں سے ملاقات کے دوران عمران خان نے کہا کہ قومی اسمبلی میں واپسی کا پلان کر رہے ہیں، ن لیگ کے ایم این اے رابطے میں ہیں، شہباز شریف کی نیندیں حرام کرنے والے ہیں، یہ بری طرح پھنس گئے ہیں، رات اسحاق ڈار نے پیٹرول بڑھانا تھا لیکن نہیں بڑھایا، اس کا مطلب ہے کہ اب عالمی مالیاتی ادارے (آئی ایم ایف) نہیں آئے گی، اپریل میں انتخابات ہوتے ہوئے نظر آ رہے ہیں اور اب ہم قومی اسمبلی میں واپسی کا پلان کر رہے ہیں، رن آف الیکشن ہوا تو موقع کے مطابق فیصلہ کریں گے اور اگر قومی اسمبلی میں نہ گئے تو یہ راجہ ریاض کے ساتھ مل کر نگراں حکومت لے کر آئیں گے، ان میں اخلاقیات نام کی کوئی چیز نہیں ہے۔
انہوں نے کہا کہ ق لیگ کا مستقبل تحریک انصاف کے ساتھ ہے، ق لیگ بلے کے نشان پر لڑےگی تو ان کی جیت ہوگی، میں چاہتا ہوں اتحاد والا کام ختم ہو، البتہ پہلے انہیں ٹیسٹ کریں گے پھر شامل کریں گے۔
قومی اسمبلی میں واپسی سے متعلق پی ٹی آئی چیئرمین کا کہنا تھا کہ پارلیمنٹ میں نگراں سیٹ اپ کے لئے واپس جا سکتے ہیں، مجھے یقین ہے مارچ اپریل میں الیکشن ہو جائیں گے۔سندھ بلدیاتی انتخابات میں شکست پر عمران خان نے کہا کہ کراچی میں ہارنے کی اہم وجہ تنظیم کی کمزوری اور پیپلز پارٹی کی دھاندلی بھی ہے۔
