اسلام آباد(کرائم رپورٹر)ملک بھر میں جہاں دہشت گردی کی تازہ لہر نے شہریوں میں خوف و ہراس پیدا کیا ہے وہیں وفاقی دارالحکومت کی سیکیورٹی اور امن و امان کے حوالے سے انتہائی تشویش ناک اعداد و شمار سامنے آئے ہیں ،وفاقی دارالحکومت اسلام آباد اورشہریوں کے تحفط کے لئے بھرتی کئے گئے کاو¿نٹر ٹیررازم ڈیپارٹمنٹ (سی ٹی ڈی) کے 850 میں سے 700 اہلکار وی آئی پیز کی ڈیوٹی پر مامور ہیں، جبکہ صرف 150 سی ٹی ڈی اہلکار 20 لاکھ سے زائد آبادی کا تحفظ کرتے ہیں۔
’پاکستان ٹائم ‘ کے مطابق وفاقی دارالحکومت میں ہونے والی وارداتوں میں 130 فیصد اضافہ ہوگیا ہے اور پولیس افسران صاحب اقتدار کو خوش کرنے میں مصروف ہیں، سی ٹی ڈی کی 80 فیصد نفری وی آئی پیز ڈیوٹی پر مامور ہے۔77رکنی وفاقی کابینہ، ججز، پولیس افسران کی سیکیورٹی پر 700 سی ٹی ڈی اہلکارتعینات ہیں، موجودہ پولیس افسران نے گزشتہ ادوارمیں بنائی گئی جدید اسلحہ سے لیس 90 سے زائد اہلکاروں پر مشتمل سی ڈی ٹی کی ہائی الرٹ ٹیم کو بھی ختم کردیا۔
