اسلام آباد(سیاسی رپورٹر)پاکستان تحریک انصاف(پی ٹی آئی ) کے اراکین قومی اسمبلی کے لئے پارلیمنٹ ہاوس،سپیکر ہاوس اور الیکشن کمیشن آفس کے دروازے بند کردیئے گئے،پی ٹی آئی اراکین استعفیٰ واپس لینے پارلیمنٹ پہنچے لیکن دروازے بند ملنے پر سپیکر قومی اسمبلی کے گھر کے باہر دھرنا دے دیا،کچھ رہنما الیکشن کمیشن کے آفس بھی پہنچ گئے تاہم الیکشن کمیشن کے دروازے بھی بند کردیئے جس پر پی ٹی آئی اراکین نے سپیکر راجا پرویز اشرف کے گھر کے باہر دھرنا دے دیا ہے،اس موقع پر حفاظتی اقدامات کے لئے پولیس کی بڑی تعداد بھی موجود ہے ۔
’پاکستان ٹائم ‘ کے مطابق سپیکر کو اپنے استعفے واپس لینے کی ای میل بھیجنے کے بعد پی ٹی ارکان ارکان پارلیمنٹ ہاوس پہنچے جہاں دروازے بند ملے،اندرجانے کی اجازت نہ ملنے پر منسٹر انکلیو آئے تاہم سپیکر راجا پرویز اشرف سے ملاقات کی خواہش وہاں بھی پوری نہیں ہوئی تو ان اراکین نے سپیکر کے گھر کے باہر دھرنا دے دیا۔تحریک انصاف کے اراکین کا کہنا ہے کہ استعفے واپس لینے اور جعلی قائد حزب اختلاف کوہٹانے آئے تھے لیکن سپیکر ملاقات نہیں کر رہے۔تحریک انصاف کے رہنماء عامر ڈوگر کی سربراہی میں پی ٹی آئی اراکین نے حکومتی رویے کے خلاف نعرے بازی بھی کی۔عامر ڈوگر نے میڈیا سے گفتگو میں کہا کہ عمران خان کی ہدایت پر جعلی قائد حزب اختلاف کو ہٹانے کے لیے پارلیمنٹ آئے تھے تاہم حکومت نے 4 دن کیلئے پارلیمنٹ بند کردی ہے،اب سپیکر سے ملاقات کرینگے تاکہ استعفے واپس لیں،ہمارا مقصد جعلی اپوزیشن لیڈرکو نکال ک اپنا اپوزیشن لیڈرلانا ہے،انتخابات کا ماحول بن چکا ہے،اب ہمیں راستہ نکالنا ہے۔ قومی اسمبلی بھی جلدتحلیل ہوجائیں گی،ہم الیکشن کمیشن جا کر بتائیں گے کہ استعفے دے دیے ہیں تا کہ اگر کوئی سپیکر غلط کام کرے تو انہیں پہلے سے پتہ ہونا چاہئے۔
واضح رہے کہ تحریک انصاف کے ارکان نے سپیکر قومی اسمبلی سے لیڈر آف اپوزیشن اور پارلیمانی پارٹی کے عہدے تحریک انصاف کو دینے کیلئے استعفیٰ واپس لینے کی استدعا کی ہے۔پاکستان تحریک انصاف نے 79 ارکان کے استعفوں کی منظوری کے بعد 44 ارکان قومی اسمبلی کے استعفے واپس لینے کا فیصلہ کیا ہے۔اس حوالے سے سیکرٹری جنرل پی ٹی آئی اسد عمر نے اپنی ٹویٹ میں کہا کہ سپیکر ابھی تک تمام اسمبلی ارکان کے استعفے قبول نہیں کر رہے،اسلئے پارٹی چیئرمین کی ہدایات کے مطابق 44 ارکان اسمبلی نے اپنے استعفے واپس لینے کا فیصلہ سپیکر قومی اسمبلی کو ای میل کردیا ہے،اگلا قدم اپوزیشن لیڈر کی نامزدگی ہو گی۔پی ٹی آئی رہنما فواد چوہدری نے بھی اسی حوالے سے کی جانے والی ٹویٹ میں بتایا کہ 45 ممبران اسمبلی نے سپیکر قومی اسمبلی سے لیڈر آف اپوزیشن اور پارلیمانی پارٹی کے عہدے تحریک انصاف کو دینے کیلئے استعفیٰ واپس لے لیے ہیں۔واضح رہے کہ سپیکر قومی اسمبلی کی جانب سے چند روز قبل پی ٹی آئی کے مزید 35 ارکان کے استعفے منظور کیے جانے کے بعد سے مستعفی ارکان کی کل تعداد 79 ہو گئی تھی۔
