لاہور(سٹاف رپورٹر)ملک میں سیاسی درجہ حرارت بڑھنے لگا،پاکستان تحریک انصاف( پی ٹی آئی)نجی ٹی وی کے مالک اور آصف زرداری کے’دست راست ‘محسن نقوی کو نگران وزیراعلیٰ پنجاب بنانے کے خلاف لاہور میں میدان سجاتے ہوئے احتجاج شروع کردیا،خواتین اور بچوں سمیت کپتان کے سینکڑوں کھلاڑی احتجاج کرتے رہے۔
’پاکستان ٹائم ‘ کے مطابق نگران وزیراعلیٰ پنجاب محسن نقوی کے تقرر کے خلاف پی ٹی آئی مظاہرین پہلے الیکشن کمیشن آفس کے سامنے جمع ہوئے بعد میں احتجاج کا مقام تبدیل کردیا گیا۔پی ٹی آئی کارکنوں کو الیکشن کمیشن سے پی ایم جی چوک پہنچنے کی ہدایت کی گئی تھی،جس کے بعد کارکن الیکشن کمیشن سے پی ایم جی چوک پہنچے۔تحریک انصاف کے احتجاج کے باعث ہال روڈ،شاہراہ قائد اعظم،فین روڈ،کوپر روڈ،شاہ عالم روڈ،ریگل چوک،لوئر مال،استبول چوک،جی پی او چوک پر ٹریفک شدید جام ہو گیا۔
اس موقع پر سابق وفاقی وزیر حماد اظہر نے نگران وزیر اعلیٰ پنجاب پر تنقید کرتے ہوئے کہا کہ محسن نقوی کو غیور عوام کا پیسہ روکنے کے لئے لایا گیا ہے۔انہوں نے کہا کہ ملک تباہ ہو گیا ،معیشت ڈوب گئی،ملک میں بجلی نہیں،گیس نہیں،بے روزگاری بڑھ گئی،مہنگائی عروج پر پہنچ گئی،غریب خود کشی کرنے لگ گیا لیکن سہولت کاروں کا دل ابھی تک نہیں بھرا ۔خاتون رہنما عالیہ حمزہ ملک کا کہنا تھا کہ محسن نقوی کی تقرری سے ملک میں دھاندلی کا آغاز ہوگیا، محسن نقوی آصف زرداری کے منہ بولے بیٹے ہیں،انہوں نے عمران خان پر حملے کی جے آئی ٹی کو تبدیل کردیا۔
اس سے قبل لاہور میں میڈیا سے گفتگو کرتے ہوئے فواد چوہدری نے کہا کہ الیکشن کمیشن اور گورنر انتخابات کی تاریخ نہیں دے رہیں،دونوں گورنرز آرٹیکل 6 کی خلاف ورزی سے مرتکب ہو رہے،سب یہاں کھڑے ہیں جس نے جیل میں ڈالنا ہے ڈال دے،اس طرح سے ملک نہیں چلا کرتے،عمران خان کی وجہ سے پاکستان ایک فیڈرل سٹیٹ ہے،جب کہ رضاکارانہ طور پر قرضہ واپس کرنے والا پٹواری نہیں ہو سکتا۔پی ٹی آئی رہنما کا کہنا تھا کہ راجہ ریاض ایک طوطا ہے جس میں شہباز شریف کی جان ہے، 19 لوٹوں کو بچانے کے لئے 127 ارکان کے استعفے منظور کئے گئے،ہم اس لئے استعفے نہیں دینا چاہتے تاکہ اس طوطے کی گردن پکڑ سکیں،البتہ ہمیں اس اسمبلی میں جانے کا کوئی شوق نہیں۔
