پشاور(کرائم رپورٹر)پشاورمیں کم عمر موٹرسائیکل سوار ہوجائیں ہوشیارکیونکہ اب قانون کی خلاف ورزی کرنے والے کم عمر موٹرسائیکل سواروں کے لئے ٹریفک پولیس نے حکمت عملی تیار کرلی ہے۔
”پاکستان ٹائم “کے مطابق شہر میں کم عمر موٹرسائیکل سواروں کی بھرمار ہونے کے باعث دن بھر کم عمر لڑکے بغیر ڈرائیونگ لائسنس اور ٹریفک پولیس کے خوف کے سڑکوں پر موٹرسائیکل چلا رہے ہوتے ہیں ساتھ ہی ٹریفک قوانین کا بالکل خیال نہیں رکھتے۔ایس ایس پی ٹریفک شہزادہ عمر عباس بابر کے مطابق انہوں نے نئی حکمت عملی ترتیب دے دی ہے،جس کے بعد کم عمر نوجوانوں کی موٹر سائیکلیں ضبط کر کے ان کے والدین کو تھانے طلب کیا جائے گا اور والدین سے کم عمر بچوں کے آئندہ ڈرائیونگ نہ کرنے کی انڈرٹیکنگ بھی لی جائے گی۔ایس ایس پی ٹریفک کے مطابق ٹریفک پولیس کی ایجوکیشن ٹیم تعلیمی اداروں میں جا کر کم عمری کی ڈرائیونگ کے خلاف آگاہی مہم بھی چلا رہی ہے۔
