کراچی(سٹاف رپورٹر)پاکستان پیپلز پارٹی کے مرکزی رہنما اور صوبائی وزیراطلاعات سندھ شرجیل انعام میمن نے سابق وزیر داخلہ شیخ رشید احمد کی جانب سے آصف علی زرداری پر لگائے گئے سنگین الزامات کی شدید مذمت کرتے ہوئے انہیں مسترد کردیا ہے اور کہا ہے کہ شیخ رشید آصف زرداری پرجھوٹے الزامات لگا رہے ہیں، وہ سیاسی بے روزگاری کا شکار ہیں۔
”پاکستان ٹائم “ کے مطابق صوبائی وزیر اطلاعات سندھ شرجیل انعام میمن کا کہنا تھا کہ شیخ رشید سابق صدر آصف علی زرداری پر جھوٹے اور من گھڑت الزامات لگا رہے ہیں، شیخ رشید سیاسی بے یتیمی اور سیاسی بے روزگاری کا شکار ہو چکے ہیں وہ سی وی لیکر گھوم رہے ہیں ،پیپلز پارٹی، ن لیگ اور جے یوآئی نے انہیں جواب دے دیا ہے، دھرنا اوراحتجاج پاکستان تحریک انصاف( پی ٹی آئی )کا مقدر بن گیا۔ان کا کہنا تھا کہ شیخ رشید لال حویلی سے بے دخل ہونے سے بچنے کے لیےالزامات لگا رہے ہیں جبکہ آصف زرداری نے پاکستان کھپے کا نعرہ لگا کر مشکل حالات میں ملک کو بچایا تھا۔شرجیل انعام میمن نے کہا کہ محسن نقوی کا انتخاب الیکشن کمیشن نے کیا ، وہ اچھی شہرت کی شخصیت ہیں، پی ٹی آئی والے چاہتے ہیں ان کی مرضی کے لوگ لگائے جائیں ،۔انہوں نے کہا کہ پرویزالٰہی فواد چوہدری کی گرفتاری کا جشن منا رہے ہیں، عمران خان گرفتاری کے خوف سے زمان پارک کے بل میں چھپے ہوئے ہیں، لوگوں کا باہر اجتماع جمع کر کے عمران خان سمجھتے ہیں کہ وہ مقدمات سے بچ جائیں گے۔
