لاہور(سٹاف رپورٹر)پاکستان مسلم لیگ ن کے رہنما اور مریم نواز شریف کے شوہر کیپٹن(ر)محمد صفدر نے کہا ہے کہ وہ جلد ہی عمران خان کو جیل میں دیکھ رہے ہیں۔
”پاکستان ٹائم “ کے مطابق لاہور میں تاجروں سے خطاب کرتے ہوئے کیپٹن (ر) صفدر نے سابق وزیراعظم اور پاکستان تحریک انصاف کے چیئرمین پر کڑی تنقید کی اور کہا کہ عمران خان نے ملک کو سری لنکا بنانے میں کسر نہیں چھوڑی، آئین شکنوں کے احتساب کے بغیر ملک ترقی نہیں کر سکتا، پاکستان کی قدر کریں نہیں تو دنیا میں بے قدرے ہو جائیں گے،ان کو سیاست سے نکالیں گے تو پاکستان آگے بڑھے گا، چار سال کی گندگی چار دنوں میں ختم نہیں ہوگی، البتہ میں عمران خان صاحب کو بہت جلد جیل کے پیچھے دیکھ رہا ہوں۔
کیپٹن (ر)محمد صفدر نے کہا کہ تاجر ہر مشکل مرحلے میں پاکستان کے ساتھ کھڑے ہیں، تاجر ملک کی معاشی ترقی میں اہم کردار ادا کرتے ہیں ، جب پہلی مرتبہ نوازشریف حکومت میں آئے انہوں نے قرض اتارو مہم شروع کی جب کہ عمران دور میں ہزاروں ایکڑ زرعی زمین ہاو¿سنگ سوسائٹیوں کے قبضے میں دی گئی۔کیپٹن (ر)صفدر کا کہنا تھا کہ 2013 میں قوم نے نواز شریف کو دو تہائی اکثریت سے اقتدار دیا مگر سازش کے ذریعے نواز شریف کو ہٹا کر چلتی ہوئی حکومت کو چلتا کیا اور عدلیہ کے فیصلوں کی وجہ سے ملک کی معیشت کو کمزور کیا گیا، مریم نواز پاکستان آئیں گی تو ہم ان سے قومی کمیشن بنانے پر مطالبہ کرنے کی درخواست کریں گے، یہ ملک ہمارا ہے اور ہم نے اس ملک کے لیے قربانیاں دی ہیں۔
