کراچی(سٹاف رپورٹر)پاکستان مسلم لیگ ن کے رہنمااور سابق گورنر سندھ محمد زبیر نے اپنے بیان کی وضاحت کرتے ہوئے ”یو ٹرن “ لے لیا ،وضاحتی بیان میں کہتے ہیں کہ میں نے کبھی یہ نہیں کہا کہ ہماری جماعت اسحاق ڈار کی کارکردگی سے مطمئن نہیں۔
”پاکستان ٹائم“ کے مطابق وزیر خزانہ اسحاق ڈار سے متعلق اپنے بیان کی وضاحت کرتے ہوئے محمد زبیر نے کہا کہ میں نے یہ ضرور کہا تھا کہ ڈار صاحب نے اپنے حساب سے کوشش کی کہ پاکستان کے عوام پر بوجھ نہ پڑے، اسی وجہ سے اسحاق ڈار نے دوسرے سورسز سے فارن ایکسچینج لانے کی کوشش کی۔یاد رہے کہ اس سے قبل نجی ٹی وی سے گفتگو کرتے ہوئے سابق گورنر سندھ محمد زبیر کا کہنا تھا کہ اسحاق ڈار کی کارکردگی سے پارٹی مطمئن نہیں ہے، اس وقت معاشی اشاریے خراب ہیں، وہ یہ سمجھتے ہیں کہ جو فیصلے آج ہوئے ہیں وہ پہلے ہونے چاہیے تھے، روپے کی قدر میں کمی آئی ایم ایف کی شرط تھی۔ معیشت سے متعلق یہ فیصلے پہلے کر دیے جاتے۔انہوں نے کہا کہ انتخابات تو ہونے ہیں دو ماہ بعد ہوں یا چھ ماہ بعد، سی سی آئی میں فیصلہ ہوا تھا کہ انتخابات نئی مردم شماری پر ہوں گے، سی پی آئی 35 فیصد ہونے کے چانسز ہیں،ن لیگ نے پہلے تین ادوار میں بھی ڈیلیور کیا تھا، مریم نواز کو اس لیے اہم کردار دیا گیا کہ وہ عوام میں مقبول ہیں۔
