لاہور(سٹاف رپورٹر)پاکستان تحریک انصاف (پی ٹی آئی) نے پیٹرولیم مصنوعات کی قیمتوں میں اضافے کو عوام کے خلاف سازش قرار دے دیا۔
”پاکستان ٹائم“ کے مطابق مائیکرو بلاگنگ ویب سائٹ پر ٹویٹ کرتے ہوئے پاکستان تحریک انصاف کے رہنما شاہ محمود قریشی نے کہا کہ ملک پہلے ہی معاشی تباہی کے دہانے پر کھڑا ہے،آج عوام ان امپورٹڈ حکمرانوں کے ہاتھوں مزید بوجھ تلے آگئے،پیٹرول اور ڈیزل کی قیمتوں میں ایک بار پھر35 روپے اضافہ انکی ناکامی کا منہ بولتا ثبوت ہے،عوام کب تک انکی نااہلی کی قیمت ادا کریں گے؟کیا اربابِ اختیار مزید تباہی کا انتظار کریں گے؟۔پی ٹی آئی کے سیکرٹری جنرل اسد عمر کا کہنا تھا کہ پہلے ہی تاریخ کی بدترین مہنگائی سے عوام پریشان ہیں اور پیٹرول اور ڈیزل 35 روپے مزید مہنگا ہو گیا، اللہ اس قوم پر رحم کرے اور اس عذاب سے نجات دلائے۔
سابق سپیکر قومی اسمبلی اسد قیصر نے کہا کہ امپورٹڈ حکومت نے معیشت کا بیڑا غرق کرنے کے بعد پیٹرول قیمتوں میں بڑا اضافہ کر دیا ہے،پیٹرول کی قیمت میں اضافہ عوام کے ساتھ کھلے عام دشمنی کا ثبوت ہے،عوام پہلے ہی مہنگائی کی چکی میں پسے ہوئے ہیں،ان کو دو وقت کی روٹی کا حصول مشکل ہو گیا ہے،ایسے حالات میں پیٹرول کی قیمتوں میں اضافے کو مسترد کرتے ہیں۔دوسری جانب پی ٹی آئی رہنما اور سابق وفاقی وزیر حماد اظہر نے بھی ٹوئٹر پر جاری اپنے بیان میں کہا کہ پیٹرول اور ڈیزل کی قیمتوں میں اضافہ عالمی منڈی کی وجہ سے نہیں ہوا،پاکستان ڈیموکریٹک موومنٹ( پی ڈی ایم) نے معیشت تباہ کردی جس کی وجہ سے روپے کی ڈالر کے مقابلے میں قدر انتہائی کم ہو گئی،تیل سمیت تمام امپورٹڈ اشیاء اب بہت زیادہ مہنگی پڑیں گی،یہ سب رجیم چینج کی بدولت ہوا۔سابق وزیر خزانہ شوکت ترین نے پیٹرولیم مصنوعات کی قیمتوں میں اضافے کو مسترد کرتے ہوئے کہا کہ ابھی پیٹرول اور ڈیزل کی قیمتیں مزید بڑھیں گی،حکومت گیس کی قیمت بھی بڑھائے گی،کھانے پینے کی اشیا کی قیمتوں میں 45 فیصد تک اضافہ ہوگا،حالیہ دنوں میں روپیہ 14سے15فیصد تک گرا ہے،اداروں کو سوچنا چاہیے کہ یہ اس حکومت کے بس کی بات نہیں،2 اسمبلیاں تحلیل ہو چکی ہیں عام انتخابات کروائے جائیں،اس وقت ناگزیر ہے کہ عوامی مینڈیٹ والی حکومت آئے تاکہ سخت اور درست فیصلے لے سکے۔
پی ٹی آئی خیبرپختونخوا کے سیکرٹری اطلاعات شوکت یوسفزئی نے بھی اپنے وڈیو بیان میں کہا کہ تحریک انصاف پیٹرولیم مصنوعات کی قیمتوں میں اضافے کو مسترد کرتی ہے،موجودہ نالائق حکومت مہنگائی کے بجائے عوام کو ختم کرنا چاہتی ہے،پاکستان کی معیشت پہلے سے ہی معیشت ڈوبی ہوئی ہے،امپورٹڈ حکمرانوں نے غریبوں سے جینے کا حق چھیننے کی ٹھانی ہے،عوام کے ساتھ ہونے والی زیادتی کو تحریک انصاف برداشت نہیں کرے گی،امپورٹڈ حکومت عوام کی جان چھوڑے اور نئے انتخابات کا اعلان کرے،اسحاق ڈار کی تمام تھیوریاں فیل ہو چکی ہیں،ڈالر 200 پر لانے کا دعوی کیا تھا 270 پر پہنچ گیا ہے،عوام پر رحم کریں،عوام آپ کا بوجھ مزید برداشت نہیں کر سکتی۔
پی ٹی آئی رہنما خرم شیر زمان نے اپنے جاری کردہ بیان میں کہا کہ حکومت نے پیٹرولیم مصنوعات کی قیمتیں بڑھا کر عوام دشمن حکومت ہونے کا ثبوت دیا،لگتا ہے امپورٹڈ حکومت کا مشن عوام کے منہ سے نوالہ چھیننا ہے،شہباز شریف اپنے کپڑے بیچیں قوم کیلئے سستا پیٹرول لائیں،پیٹرول مہنگا ہونے سے ہر اشیاء مہنگی ہوگی،صنعتیں،سفری کاروبار متاثر ہوں گے،عوام کو ریلیف دینے کیلئے کہتے ہیں پیسہ نہیں ہے مگر قوم کا پیسہ غیرضروری دوروں،سرجریوں پر خرچ کیا جارہا ہے،پی ڈی ایم ٹولے کو گھر بھیجنا ضروری ہے،حکومت نے مہنگائی سے عوام کی چیخیں نکال دی ہیں۔
