اسلام آباد(سٹاف رپورٹر) پارلیمنٹ لاجز میں پاکستان تحریک انصاف(پی ٹی آئی )کے ڈی نوٹیفائی ہونے والے ممبران کے رہائشی اپارٹمنٹ کے تالے ٹوٹنا شروع ہو گئے ہیں، پاکستان تحریک انصاف کے مرکزی رہنما اور سابق وفاقی وزیر مملکت برائے اطلاعات و نشریات فرخ حبیب کا سامان کمرے باہر نکال دیا گیا ہے۔
”پاکستان ٹائم “ کے مطابق پی ٹی آئی کے ممبران سے پارلیمنٹ لاجز کی رہائشیں خالی کرانے کے لئے کیپٹل ڈویلپمنٹ اتھارٹی(سی ڈی اے)نے آپریشن شروع کردیا ہے ،اس ضمن میں مجسٹریٹ کی زیر نگرانی سی ڈی اے اہلکاروں نے آپریشن کے پہلے مرحلے میں سی بلاک کے رہائشی لاجز خالی کرواتے ہوئے تالے توڑنا شروع کردیئے ہیں ۔سی ڈی اے اہلکاروں نے پاکستان تحریک انصاف سے تعلق رکھنے والے ڈی نوٹیفائی ممبران کی رہائش گاہوں کو خالی کروانے کے لیے آپریشن شروع کیا ۔واضح رہے کہ پی ٹی آئی کی جانب سے مستعفی ہونے والے اراکین قومی اسمبلی کے سپیکر راجہ پرویز اشرف کی جانب سے استعفوں کو منظور کیے جانے کے بعد الیکشن کمیشن نے انہیں ڈی نوٹیفائی کردیا تھا۔یاد رہے کہ قومی اسمبلی کی نشستوں کی عوامی مسلم لیگ کے سربراہ شیخ رشید احمد اور ان کے بھتیجے شیخ شفیق راشد نے بھی استعفے دیے تھے، ان کا تعلق پی ٹی آئی سے نہیں ہے۔دوسری طرف فرخ حبیب نے انتظامیہ کی جانب سے پارلیمنٹ لاج کا تالا توڑے جانے پر رد عمل دیتے ہوئے کہا کہ ایسی کارروائیوں سے انہیں کوئی فرق نہیں پڑتا، جھوٹے مقدمات، ایف آئی آر، جیلیں سب کر لیا اور اب یہ لاجز کے تالے توڑ رہے ہیں، یہ سب کر کے ان کی اپنی آمرانہ سوچ کھل کر سامنے آ رہی ہے۔
