ملتان(وقائع نگار خصوصی)وفاقی وزیر داخلہ رانا ثناء اللہ نے پاکستان تحریک انصاف(پی ٹی آئی)کے چیئرمین اور سابق وزیراعظم عمران خان کو دھمکی دیتے ہوئے کہا ہے کہ بیٹا تم ”جیل بھرو تحریک“ شروع کرو،تمہارا علاج میں کروں گا۔
ملتان میں مسلم لیگ(ن) کے تنظیمی کنونشن سے خطاب میں رانا ثناء اللہ نے پاکستان تحریک انصاف کے سربراہ اور سابق وزیر اعظم عمران خان کو دھمکی دیتے ہوئے کہا کہ لاڈلے نے 2014 سے آج تک لانگ مارچ اور دھرنوں کے سوا کچھ نہیں کیا اور اب یہ کہہ رہا ہے میں نے”جیل بھرو تحریک“شروع کرنی ہے،بیٹا تم”جیل بھرو تحریک“شروع کرو تمہارا علاج میں کروں گا،25 مئی کو تم نے اسلام آباد لاک کرنے کیلئے آنا تھا،پھر تمہارے ساتھ جو ہوا وہ تمہیں یاد ہونا چاہئیے،تم” جیل بھرو تحریک “شروع کرو،تمہیں انہی سیلوں میں رکھیں گے جہاں تم نے ہمیں رکھا تھا،ہم تمہیں جیلوں میں ہر چیز مہیا کریں گے کھانے پینے کی لیکن ایک چیز مہیا نہیں کریں گے،اس کے بغیر تمہیں گزارا کرنا ہو گا۔
رانا ثناء اللہ نے کہا کہ یہ جو پروپیگنڈا کیا جارہا ہے کہ ن لیگ الیکشن سے گھبرا رہی ہے تو ایک بات واضح کر دوں کہ ہم الیکشن کیلئے تیار ہیں،ہم الیکشن میں کامیابی حاصل کر کے پنجاب میں اپنی حکومت بنائیں گے۔انہوں نے کہا کہ 1999 میں پوری دنیا کے رسائل میں یہ لکھا گیا ایٹمی قوت بننے کے بعد پاکستان ایشئین ٹائگر بننے جارہا ہے۔90 کی دہائی میں پوری دنیا سے وفود یہ دیکھنے آتے تھے کہ کس طرح سے پاکستان کی معیشت ترقی کر رہی ہے،پوری دنیا اور امریکہ بہادر ایک طرف تھا،وزیر اعظم کو دھمکیاں دی جارہی تھیں کہ خبردار اگر تم نے ایٹمی دھماکا کیا،اگر ہندوستان نے ایٹمی دھماکا کیا بھی ہے تو پاکستان ایٹمی دھماکا نہیں کرسکتا،کیونکہ دنیا کو یہ بات منظور نہیں کہ کوئی مسلمان ملک ایٹمی قوت ہو،ان تمام دھمکیوں کے باوجود اس وقت کے وزیر اعظم نے ملک کی خاطر،قوم کی خاطر،پوری امت مسلہ کی خاطر انڈیا کے 5 ایٹمی دھماکوں کے جواب میں 6 ایٹمی دھماکے کئے اور پاکستان کو ایٹمی قوت بنایا،آج کا پاکستان اگر آج اپنے پورے قد سے کھڑا ہے تو میاں نواز شریف کے اس فیصلے کی وجہ سے کہ پاکستان ایک ایٹمی قوت ہے، 2013 میں جب نواز شریف کو دوبارہ حکومت ملی تو پاکستان جسے دنیا ایشین ٹائگر سمجھتی تھی کہنے لگی کہ ڈیفالٹ ہونے جارہا ہے،دہشت گردی سوات میں اس حد تک بڑھ گئی تھی کہ کہا جانے لگا اگلا قدم اب اسلام آباد ہے۔
