پشاور(سٹاف رپورٹر)پشاور پولیس لائنز مسجد دھماکے کے بعد خیبرپختونخوا حکومت نے سیکیورٹی کیلئے آرٹیفیشل انٹیلیجنس استعمال کرنے کا فیصلہ کرلیا۔
”پاکستان ٹائم “کے مطابق حکومت نے پولیس لائنز میں پین ٹلٹ زوم(پی ٹی زی) کیمرے نصب کرنے کیلئے یونیورسٹی آف انجینئرنگ سے رابطہ کر لیا۔اس حوالے سے ڈائریکٹر نیشنل سینٹر آف آرٹیفیشل انٹیلیجنس ڈاکٹر گل محمد نے میڈیا سے گفتگو کرتے ہوئے کہا کہ مردان میں تجرباتی طور پر 9 کیمرے نصب کر چکے ہیں،پی ٹی زی کیمرے غیر قانونی سرگرمیوں کی نشاندہی کرسکتے ہیں،اسی لئے پولیس لائنز کیلئے بھی پی ٹی زی کیمرے تجویز کئے ہیں،پولیس لائنز کیلئے پراجیکٹ پر 5 سے 6 کروڑ روپے لاگت آئے گی۔
ڈاکٹرگل محمد نے کہا کہ پی ٹی زی کیمروں سے کوئی غیرمتعلقہ شخص داخل نہیں ہوسکتا،اس سے کسی بھی وردی میں ملبوس شخص کی نشاندہی ہوگی،یہ سسٹم سائبر حملے سے مکمل محفوظ ہے،پولیس لائنز کےتمام گیٹس پر پی ٹی زی کیمرے لگیں گے،سسٹم گاڑی میں سوار شخص کی شناخت بھی کر سکتا ہے۔
