لاہور(سپورٹس رپورٹر)پاکستانی کرکٹ شائقین کے لئے بڑی خوشخبری آ گئی ،نجم سیٹھی نے ایسا اعلان کردیا ہے کہ ایشیا کپ میں پاکستان کو دھمکیاں دینے اور بلیک میل کرنے والے بھارت کو مرچیں لگ جائیں گی ۔
”پاکستان ٹائم “ کے مطابق پاکستان کرکٹ بورڈ (پی سی بی) کی منیجمنٹ کمیٹی کے سربراہ نجم سیٹھی نے اعلان کیا ہے کہ پاکستان اور افغانستان کی ٹیموں کے درمیان 3 ٹی 20 میچز پر مشتمل سیریز کھیلی جائے گی،پاکستانی شاہین رواں سال مارچ کے آخر میں افغانستان کے خلاف تین ٹی ٹوئنٹی میچز کھیلیں گے ،یہ تینوں میچز شارجہ میں کھیلے جائیں گے۔مائیکرو بلاگنگ ویب سائٹ پر ٹویٹ کرتے ہوئے نجم سیٹھی کا کہنا تھا کہ مجھے یہ اعلان کرتے ہوئے خوشی ہو رہی ہے کہ پاکستان کرکٹ ٹیم افغانستان کے خلاف شارجہ میں مارچ کے آخر میں 3 ٹی 20 انٹرنیشنل میچز کھیلے گی۔ پاک ،افغان کرکٹ سیریز کا مقصد آسٹریلیا کی جانب سے افغانستان کے خلاف دوطرفہ سیریز سے دستبرداری کے بعد ہونے والے نقصان کی تلافی کرنا ہے۔انہوں نے مزید کہا کہ میں نے ایشین کرکٹ کونسل (اے سی سی) کے افغانستان کو بی سی سی آئی، پی سی بی، بی سی بی اور ایس ایل سی بورڈز کی آمدنی میں برابر حصہ دینے کے فیصلے کی بھی حمایت کی ہے۔
واضح رہے کہ گزشتہ ماہ آسٹریلیا نے طالبان کی جانب سے خواتین کے حقوق کے خلاف کیے گئے اقدامات کو جواز بناتے ہوئے متحدہ عرب امارات میں افغانستان کے خلاف مارچ میں ہونے والی ایک روزہ میچوں کی سیریز سے دستبردار ہونے کا اعلان کردیا تھا،دونوں ٹیموں کے درمیان یہ طے شدہ سیریز آئی سی سی سپر لیگ کا حصہ تھی جو آسٹریلین ٹیم کے دورہ بھارت کے بعد مارچ میں ہونی تھی۔
