لاہور(وقائع نگار خصوصی)پاکستان تحریک انصاف(پی ٹی آئی)کے سربراہ اور سابق وزیر اعظم عمران خان نے کہا ہے کہ رضا کارانہ طور پر”جیل بھرو تحریک“ کے لیے رجسٹریشن کرائیں،پھر تاریخ دوں گا۔
”پاکستان ٹائم “ کے مطابق عمران خان نے جاری کردہ اپنے ویڈیو پیغام میں کہا ہے کہ قومیں قانون کے تحت چلتی ہیں، آئین فیصلہ کرتا ہے کیا جائز ہے کیا ناجائز؟لیکن جب سے امپورٹڈ حکومت آئی ہے،آئین کی دھجیاں اڑائی گئی ہیں، عدالت نے اسلام آباد بلدیاتی الیکشن 48 گھنٹے میں کرانے کا حکم دیا،مہینہ ہو گیا لیکن اسلام آباد میں بلدیاتی انتخابات نہیں ہو رہے،آئین بنیادی حقوق کی حفاظت کرتا ہے مگر ہمارے لوگوں کو اٹھایا گیا،ایک ٹویٹ پر لوگوں کو اٹھا کر تشدد کیا گیا،کئی لوگوں کا تشدد کے بعد ذہنی توازن ٹھیک نہیں ہوا،عدالت شیخ رشید کو ضمانت دیتی ہے تو سندھ و بلوچستان میں کیسز بنائے جاتے ہیں،عدالت کہتی ہے فواد چودھری کو عدالت میں پیش کریں لیکن وہ اسلام آباد لے جاتے ہیں، 25 مئی کو پرامن احتجاج کرنے والوں پر تشدد کیا گیا،قوم کا آئین اور قانون پر سے اعتماد اٹھتا جا رہا ہے،آئین میں واضح ہے کہ 90 دن میں الیکشن ہوں گے،پنجاب اور خیبرپختونخوا میں حکومتیں آئین کے تحت تحلیل کیں،ملک بحران اور سیاسی عدم استحکام کا شکار ہے۔
انہوں نے کہا کہ ہم نے 2 حکومتوں کی قربانی دیں، 20 سے 25 دن ہو گئے لیکن الیکشن کمیشن اور گورنرز نے الیکشن کی تاریخ نہیں دی،اگر 90 دن سے آگے گئے تو آئین میں واضح ہے کہ آرٹیکل 6 لگے گا،پوری قوم عدالتوں کی طرف دیکھ رہی ہے، نظریہ ضرورت سے ملک کے نیچے جانے کا سفر شروع ہوا،اب بھی وہی وقت ہے،اگر 90 دن سے الیکشن آگے گئے تو انصاف کیلئے’ جیل بھرو تحریک‘ کا فیصلہ کیا،جن پر کرپشن کے مقدمات تھے،انہیں جیل میں شاہانہ انداز میں رکھا گیا، مریم نوازکو پانامہ انکشاف کے بعد جیل میں رکھا گیا،کوئی تشدد نہیں ہوا،ایک راستہ یہ ہے کہ ہڑتال کریں،پہیہ جام کریں، پتھراو کریں لیکن ملک میں معاشی بحران ہے،اس لئے ہڑتال نہیں کر رہے،پرامن جدوجہد کے طور پر جیل بھرو تحریک کا فیصلہ کیا ہے”جیل بھرو تحریک“سے حقیقی آزادی اور حقیقی جمہوریت حاصل کریں گے۔
