اسلام آباد(سٹاف رپورٹر)کینیا میں قتل کیے جانے والے معروف پاکستانی صحافی ارشد شریف کی بیوہ جویریہ صدیقی نے اپنے خلاف سوشل میڈیا پر”دوسری خفیہ شادی“کے حوالے سے منظم مہم چلانے والوں کے خلاف کارروائی کا اعلان کیا ہے۔
”پاکستان ٹائم “ کے مطابق گزشتہ روز سے سوشل میڈیا پر کئی ٹویٹس میں دعویٰ کیا جارہا ہے کہ جویریہ صدیقی نے دوران عدت ہی دوسرا نکاح کرلیا ہے۔یہ دعویٰ بھی کیا جا رہا ہے کہ یہ شادی ایک مشہور معروف سیاسی شخصیت سے کی گئی ہے۔جویریہ صدیقی کی جانب سے ایسی افواہیں پھیلانے والوں کے خلاف قانونی چارہ جوئی کا اعلان کرتے ہوئے کہا ہے کہ ان کے وکلاء اس منظم کمپین کا معاملہ ایف آئی اے اور سپریم کورٹ میں اٹھائیں گے۔ایسی ٹویٹس کرنے والوں میں ممبر چیمبر آف کامرس اینڈ انڈسٹری اور مسلم لیگ ن وومن ونگ راولپنڈی ڈویژن کی صدر ثمینہ عارف کے علاوہ پاکستان تحریک انصاف کی سابق رکن پنجاب اسمبلہ مومنہ وحید بھی شامل ہیں۔ثمینہ عارف نے الزام عائد کیا کہ جویریہ صدیقی نے یہ شادی سابق گورنر سندھ اور اہم پی ٹی آئی رہنما عمران اسماعیل سے کی ہے تاہم مومنہ وحید نے اپنی ٹویٹ میں کسی کا نام نہیں لیا لیکن ان دونوں کی خواتین کی جانب سے ایک دوسرے کی ٹویٹ کو ری ٹویٹ کرنے سے ظاہر ہوتا ہے کہ ان کا مدعا ایک ہی تھا۔ایسی خبریں پھیلانے والوں کے لیے اپنی ٹویٹ میں جویریہ نے لکھا کہ جعلی ٹویٹس کرنے والوں کے خلاف قانونی کارروائی کی جائے گی،ہم ارشد شریف شہید کے لئے انصاف لیکر رہیں گے،سوشل میڈیا پر ٹویٹس یا پوسٹ کروا کے آپ ہمیں خاموش نہیں کروا سکتے۔دوسری جانب ٹوئٹرپر ہیش ٹیگ کے ساتھ ’سٹے سٹرونگ جویریہ بھابھی’ ٹرینڈ میں ارشد شریف کی بیوہ سے اظہار یکجہتی کرتے ہوئے انہیں تسلی دی جارہی ہے۔اپنی حمایت میں آواز اٹھانے پر جویریہ نے ٹوئٹر فالوورز کا شکریہ بھی ادا کیا۔
