اسلام آباد(سٹاف رپورٹر)وزیر اعظم شہباز شریف نے اپنے خصوصی اختیارات کے ساتھ ایک ہی روز میں دوسری مرتبہ 2 اراکین قومی اسمبلی کو معاونین خصوصی مقرر کر دیا ہے۔اس سے قبل وزیراعظم شہباز شریف نے مسلم لیگ ن سے تعلق رکھنے والے 5 اراکین قومی اسمبلی کو معاون خصوصی مقرر کیا تھا ۔
”پاکستان ٹائم “ کے مطابق وزیر اعظم نے سات اراکین قومی اسمبلی کو معاون خصوصی مقرر کردیا جبکہ ان ساتوں اراکین کی تقرری اعزازی تصور کی جائے گی۔کابینہ ڈویژن سے جاری نوٹیفکیشن کے مطابق وزیر اعظم نے اراکین قومی اسمبلی محمد اجمل خان،شائستہ پرویز ملک،محمد حامد حمید،قیصر احمد شیخ،ملک سہیل خان،چوہدری عابد رضا اور محمد معین وٹو کو اپنا معاونین خصوصی مقرر کردیا ہے۔ابھی تک حکومت کی جانب سے ان ساتوں افراد کو کسی بھی قسم کی ذمے داری سونپنے کا اعلان نہیں کیا گیا البتہ انہیں معاون خصوصی کے قلمدان تفویض کر دیے گئے ہیں۔ان تمام اراکین کا عہدہ وزیر مملکت کے برابر تصور ہو گا۔
یاد رہے کہ ان سات افراد کی کابینہ میں شمولیت سے دو دن قبل ہی وزیر اعظم نے معروف کاروباری شخصیت جواد سہراب ملک کو بھی کابینہ میں شامل کرنے کی منظوری دی تھی لیکن جواد سہراب نے کسی بھی قسم کی سرکاری مراعات اور سہولیات لینے سے انکار کردیا تھا۔ان سات افراد کی شمولیت کے بعد وفاقی کابینہ کے اراکین کی تعداد بڑھ کر 85 ہو گئی ہے جس میں 34 وفاقی وزرا، 7 وزرائے مملکت، وزیر اعظم کے چار مشیر اور 40 معاون خصوصی شامل ہیں۔
