لاہور(سٹاف رپورٹر)پاکستان تحریک انصاف (پی ٹی آئی) نے ”جیل بھرو تحریک“ کے حوالے سے اپنا لائحہ عمل تبدیل کرتے ہوئے ایک بار پھر ’یوٹرن‘ لے لیا ہے۔
”پاکستان ٹائم “ کے مطابق پی ٹی آئی ذرائع کا کہنا ہے کہ پارٹی ٹکٹ پر الیکشن میں حصہ لینے والے گرفتاریاں نہیں دیں گے، امیدوار اپنی انتخابی مہم پر توجہ دیں گے، بوقت ضرورت مرکزی و صوبائی رہنما اور کارکن گرفتاریاں دیں گے۔اس حوالے سے پی ٹی آئی رہنما اور سابق وفاقی وزیر حماد اظہر کا کہنا ہے کہ اسمبلیاں تحلیل ہونے کے بعد 90 روز میں انتخابات ضروری ہیں، پی ٹی آئی تمام انتخابات میں بھرپور حصہ لے گی، تمام انتخابات میں پی ٹی آئی بھرپور کامیابی حاصل کرے گی، میدان میں اترنے کیلئے تیار ہیں، الیکشن سے نہیں بھاگیں گے۔ دوسری جانب پی ٹی آئی کے اراکین قومی اسمبلی کی پارلیمنٹ لاجز خالی نہ کروانے کی درخواست منظور کرلی گئی ہے۔ پی ٹی آئی کے 50 سے زائد سابق ایم این ایز نے سپیکر سے ٹیلیفونک رابطہ کیا۔سابق ممبران نے پارلیمنٹ لاجز میں مزید چند روز قیام کرنے کی گزارش کی تھی۔ممبران اسمبلی کا کہنا ہے کہ لاجز میں سامان ہے، چند روز دیئے جائیں۔سپیکر پرویز اشرف نے پی ٹی آئی کے سابق ممبران کی گزارش منظور کرتے ہوئے مزید 15 دنوں کا وقت دے دیا۔ سپیکر آفس کا کہنا ہے کہ جو تحریری درخواست کررہا ہے اسے مہلت دی جارہی ہے۔
