لاہور(سٹاف رپورٹر) پاکستان تحریک انصاف (پی ٹی آئی)کے سربراہ اور سابق وزیراعظم عمران خان نے مریم نواز شریف پر طنز کرتے ہوئے کہا ہے کہ چیف آرگنائزر ن لیگ کو” مسز منڈیلا “بنا کر لانچ کرنے کی ناکام کوشش کی گئی،پاکستان میں آئین کی بالا دستی کا راستہ صرف عدلیہ کے پاس ہے، موجودہ حکومت انتخابات کروانے میں سنجیدہ نہیں، بروقت انتخابات کے انعقاد کیلئے صرف عدلیہ سے امید ہے،آئندہ عام انتخابات میں پارٹی ٹکٹ صرف وفادار اور مخلص لوگوں کو دیں گے۔
”پاکستان ٹائم “ کے مطابق لاہور میں صحافیوں سے ملاقات کے دوران عمران خان کا کہنا تھا کہ موجودہ حکومت انتخابات کرانے میں سنجیدہ نہیں، آئین کی بالادستی کا راستہ صرف عدلیہ کے پاس ہے، اسی لئے بروقت انتخابات کے لئے صرف عدلیہ سے امید ہے۔آل پارٹیز کانفرنس میں شرکت پر عمران خان نے کہا کہ تالی ایک ہاتھ سے نہیں، دونوں ہاتھوں سے بجتی ہے، حکومت دہشت گردی کے خلاف اے پی سی بلائے تو سہی، کانفرنس میں جانے کا فیصلہ بعد میں کریں گے۔ملکی معیشت پر پی ٹی آئی چیئرمین کا کہنا تھا کہ عالمی مالیاتی فنڈ (آئی ایم ایف) معاہدے سے مہنگائی کا طوفان آئے گا، حکمران اپنے ڈالر باہر منتقل کر رہے ہیں، لہٰذا معیشت کو سمندر پار پاکستانیوں کی سرمایہ کاری بچا سکتی ہے۔انہوں نے کہا کہ مریم نواز کو مسز منڈیلا بنا کر لانچ کرنے کی کوشش کی گئی جوکہ ناکام ہوئی، البتہ نواز شریف پاکستان واپس آئیں تو ان کی مقبولیت کا اندازہ ہو جائے گا۔
