پاکستان ٹائم کے مطابق صدر مملکت ڈاکٹر عارف علوی نے چیف الیکشن کمشنر کو انتخابات کے متعلق خط لکھا ہے، خط میں صدر مملکت نے انہیں انتخابات سے متعلق مشاورت کے لیے ہنگامی اجلاس کی دعوت دی ہے.
اس حوالے سے ایوان صدر کے پریس ونگ کا کہنا ہے کہ صدر مملکت ڈاکٹر عارف علوی نے چیف الیکشن کمشنر سکندر سلطان راجا کو مشاورت کی دعوت دی ہے. یہ دعوت 20 فروری کو ایوان صدر میں سیکشن 57 کے تحت دی گئی ہے.
خط میں لکھا گیا ہے کہ ایکٹ کے تحت صدر مملکت عام انتخابات کی تاریخ یا تاریخوں کا اعلان الیکشن کمیشن سے مشاورت کے بعد کریں گے۔ خط میں صدر مملکت نے الیکشن کمیشن کی جانب سے بے حسی پر ناراضگی کا اظہار بھی کیا۔اس حوالے سے صدر مملکت کا کہنا تھا کہ اب تک الیکشن کمیشن نے پہلے خط کا جواب نہیں دیا۔ ان کا کہنا تھا کہ وہ بے چینی سے انتظار کر رہاے تھے کہ کمیشن اپنے آئینی فرائض کا احساس کرے گا اور اس کے مطابق کام کرے گا۔ تاہم اس قدر اہم معاملے پر الیکشن کمیشن کے افسوسناک رویے سے انتہائی مایوسی ہوئی.
صدر مملکت نے کہا کہ آئین کے تحفظ اور دفاع کی اپنی آئینی ذمے داری کا احساس ہے، اس لئے میں چیف الیکشن کمشنر کو اپنے دفتر میں الیکشن پر مشاورت کے لیے ہنگامی ملاقات کے لیے دعوت دیتا ہوں.
