پاکستان ٹائم مانیٹرنگ ڈیسک کے مطابق بلغاریہ میں ایک ٹرک سے اٹھارہ افغان تارکین وطن کی لاشیں برآمد ہوئیں ہیں۔ بتایا جا رہا ہے کہ اس ٹرک میں لکڑی کے کمپارٹمنٹس بنے ہوئے تھے جس میں 6 بچوں سمیت 34 افراد کو چھپایا گیا تھا۔رپورٹس کے مطابق ہلاک ہونے والوں کی موت دم گھٹنے کے باعث ہوئی۔
تفصیلات کے مطابق 34 میں سے زندہ بچ جانے والے 16 افراد کو اسپتال منتقل کر دیا گیا ہے۔ زندہ بچ جانے والوں میں پانچ بچے بھی شامل ہیں۔ ہسپتال انتظامیہ کے مطابق زندہ بچ جانے والوں کی حالت اب خطرے سے باہر ہے۔
اس حوالے سے پولیس کا کہنا ہے کہ افغان تارکین وطن کو غیر قانونی طور پر یورپی ممالک لے جانے کی کوشش کے الزام میں 4 افراد کو حراست میں لیا جا چکا ہے۔ جن میں سے ایک شخص پہلے بھی سزا بھگت چکا ہے۔
خیال رہے کہ افغانستان میں گزشتہ سال طالبان کی حکومت کے قیام کے بعد سے عالمی فنڈز منجمد ہیں اور ملک میں غربت میں اضافہ ہو رہا ہے۔ طالبان کی سخت پابندیوں اور غربت کے باعث اکثر افغان شہری یورپی ممالک جانے کی کوشش میں اس قسم کے حادثے کا شکار ہوجاتے ہیں۔
