لاہور(سٹاف رپورٹر)سابق وزیراعلیٰ پنجاب اور پاکستان تحریک انصاف(پی ٹی آئی )کے اہم اتحادی چوہدری پرویز الٰہی نے کہا ہے کہ موجودہ وزیراعظم تاریخ کے نا اہل ترین حکمران ثابت ہورہے ہیں، شہباز شریف کی نااہلیوں کا بوجھ اٹھانے کیلئے مریم نواز بھی تیار نہیں ہے۔
”پاکستان ٹائم “ کے مطابق چوہدری پرویز الٰہی نے کہا ہے کہ مریم نواز کی لندن سے واپسی پر دوبارہ لانچنگ بھی ناکام ہوگئی، پاکستان کی سیاست کا ایک ہی سٹار ہے اور وہ عمران خان ہے، مسلم لیگ ن میں سیاسی میدان میں عمران خان کا مقابلہ کرنے کی ہمت نہیں، چیئرمین پی ٹی آئی کے خوف نے حکمرانوں کی نیندیں حرام کردی ہیں، پنجاب کا سیاسی میدان بھی عمران خان کے نام ہوچکا، مسلم لیگ ن پنجاب کھو چکی ہے، اب ان کا کوئی مستقبل نہیں ہے۔انہوں نے کہا کہ حکمرانوں کے انتقامی اقدامات کا ڈٹ کر مقابلہ کریں گے، ہمارے حامیوں کو غیر قانونی طور پر اٹھا کر لاپتہ کیا جارہا ہے، حکمران اتحاد پاکستان ڈیمو کریٹک موومنٹ( پی ڈی ایم) کی تمام تر کوشش ہے کہ اقتدار سے چمٹا رہیں،اس کیلئے انہیں آئین شکنی بھی قبول ہے۔چوہدری پرویز الٰہی کا کہنا تھا کہ ” جیل بھرو تحریک “میں گرفتاریاں پیش کرنے کیلئے کارکنوں کا جوش و جذبہ دیدنی ہے، اوورسیز پاکستانی بھی گرفتاری کیلئے اپنا نام رضا کارانہ پیش کر رہے ہیں۔
