کراچی(سپورٹس رپورٹر)قومی کرکٹ ٹیم کے کپتان بابر اعظم سابق آسٹریلوی کپتان رکی پونٹنگ کے منہ سے اپنی تعریف سن کر خوشی سے نہال ہو گئے۔
”پاکستان ٹائم “ کے مطابق پاکستان کے سٹار بلے باز اور قومی کرکٹ ٹیم کے قائد بابر اعظم کا کہنا ہے کہ سابق آسٹریلوی کپتان رکی پونٹنگ کے منہ سے اپنی تعریف سننا میرے لئے اعزازکی بات ہے،لیجنڈری کھلاڑی تعریف کرتا ہے تو آپ مزید بہتر ہونے کی کوشش کرتے ہیں،میدان میں اپنے کھلاڑیوں کواعتماد دینے کی کوشش کرتا ہوں تاکہ اچھے نتائج مل سکیں۔بابر اعظم نے کہا کہ رکی پونٹنگ نے میرے بارے میں جو کہا وہ میرے لیے ایک اچھا احساس ہے،ان سے اپنی تعریف سن کر میرے اعتماد میں مزید اضافہ ہو گا،جب لیجنڈری کھلاڑی تعریف کرتا ہے تو آپ مزید بہتر ہونے کی کوشش کرتے ہیں،آپ کا اعتماد بڑھتا ہے اور آپ کے ذہن میں رہتا ہے کہ کوئی بڑا کھلاڑی آپ کے بارے میں بات کر رہا ہے،یہ سب کھلاڑی اس مقام سے گزرے ہوتے ہیں انہیں علم ہے کہ ابھی میرا مائنڈ سیٹ کیا ہے اور میں ان کی باتوں کو مثبت انداز میں لوں گا اور اپنی بہترین کارکردگی دِکھانے کی کوشش کروں گا۔
بابر اعظم کا کہنا ہے کہ میرا دھیان ہمیشہ اس چیز پر ہوتا ہے کہ میری ٹیم کے تمام کھلاڑی اپنی بہترین کارکردگی دکھائیں،میری کپتانی کا انداز یہ ہے کہ اپنے فیصلوں کے ساتھ دیانتدار رہوں اور ایسی ٹیم کے ساتھ کھیلوں جو پاکستان کے لئے اچھی ہو،جب آپ میدان میں ہوں تو اپنے کھلاڑیوں کو اعتماد دیں آپ جتنا اعتماد دیں گے اتنے اچھے نتائج ملیں گے، ہم سب متحد ہیں،میں امام الحق،شاداب خان اور محمد رضوان سے مشاورت کرتا ہوں،جب کوئی کھلاڑی گرے تو ہم سب اس کے اعتماد میں اضافہ کرتے ہیں۔یادرہے کہ سابق آسٹریلوی کپتان رکی پونٹنگ نے بابر اعظم کی تعریف کرتے ہوئے کہا تھا کہ بطوربیٹر اور کپتان بابر اعظم مجھ سے کئی گنا آگے ہیں،بابر اعظم اپنے کیریئر میں مزید کئی ریکارڈز توڑ سکتے ہیں،بابر اعظم کو مزید تھوڑی سی اور بہتری کی ضرورت ہے،آنے والے دنوں میں بابر اعظم پاکستان کا کامیاب ترین کپتان بن سکتا ہے۔
