لاہور(وقائع نگار خصوصی)پاکستان مسلم لیگ ن کے رہنما اور معاون خصوصی وزیر اعظم عطاء اللہ تارڑ نے کہا ہے کہ خواتین سے انتقام لینے کی روایت تحریک انصاف نے ڈالی ہے،بشریٰ بی بی گھریلو کیسے ہوں گئیں؟فرح گوگی باہر جاتی تھی تو پرائیوٹ جیٹ کا انتظام کیا جاتا تھا،اس کے دفاع میں عمران نیازی خود سامنے آئے،عمران نیازی کب تک ضمانت پارک میں پناہ گزین رہیں گے؟گرفتاری کا نام سن کر خوف سے کپکپی طاری ہوجاتی ہے۔
وزیر اعظم کے معاون خصوصی عطا تارڑ کا لاہور میں پریس کانفرنس کرتے ہوئے کہنا تھا کہ ایک لیڈر صاحب ضمانت لیکر گرفتاری سے بچ رہے ہیں،گرفتاری کا نام سن کر خوف سے کپکپی طاری ہوجاتی ہے،ایک رات کو حوالات میں رہا تو رونا شروع کردیا تھا یہ” جیل بھرو“ سے زیادہ”جیل سے بچو“تحریک ہے جو پہلے دن ہی ناکام ہوگئی زمان پارک کا نام تبدیل کرکے”ضمانت پارک“ رکھ دینا چاہئے،عمران نیازی کب تک ”ضمانت پارک“میں پناہ گزین رہیں گے،ان کے خلاف توشہ خانہ کا کیس چل رہا ہے،ایک مقدمہ ہے فرد جرم تو عائد ہوجانی چاہئے،نیب نے9 اپریل کو آپ کو طلب کیا ہے،بہادر بنیں اور پیش ہوں،نیب نے بھی آپ کو طلب کیا ہے۔
عطا تارڑ کا کہنا تھا کہ یہ گھریلو خاتون کا ٹیگ کیا ہوتا ہے؟بشریٰ بی بی گھریلو کیسے ہوں گئیں؟ہر سرکاری امور میں آپ ان سے مشورہ کرتے رہے ہیں،یہ کوئی بات نہیں کہ اہلیہ گھریلو خاتون ہیں پیش نہیں ہوں گی،گھریلو خاتون تھی تو توشہ خانہ کے تحائف پر سانپ کی طرح کیوں بیٹھی تھی؟توشہ خانہ کے تحائف کا تخمینہ بھی اپنی نگرانی میں کراتی تھیں،کیا آپ کی اہلیہ نے توشہ خانہ کے تحائف کی تصاویر کھینچنے پر ڈانٹا نہیں تھا؟احتساب کی باری آتی ہے تو آپ کہتے ہیں گھریلو خاتون ہیں،کیا جہانگیر ترین کی بیٹیاں،علیم خان کی اہلیہ،شہباز شریف کی بیٹی گھریلو خاتون نہیں تھیں؟مریم نواز کو موت کی چکی میں رکھا توآپ کو شرم نہیں آئی؟خواتین سے انتقام نہیں لیا جاتا،یہ روایت آپ نے ڈالی ہے۔
