اسلام آباد(کورٹ رپورٹر)سپریم کورٹ نے پنجاب اور خیبرپختونخوا میں الیکشن نہ کرانے کے معاملے پر ازخود نوٹس لے لیا، چیف جسٹس عمر عطا بندیال کی سربراہی میں 9 رکنی بنچ کل(جمعرات کو) کیس کی سماعت کرے گا۔
”پاکستان ٹائم “ کے مطابق چیف جسٹس سپریم کورٹ عمر عطا بندیال نے صوبائی اسمبلیوں کے الیکشن کے معاملے پر ازخود نوٹس لیتے ہوئے لارجر بنچ تشکیل دے دیا۔کیس کی سماعت 23 فروری دوپہر دو بجے ہوگی۔چیف جسٹس کی سربراہی میں بننے والے بینچ میں جسٹس اعجاز الاحسن،جسٹس منصور علی شاہ،جسٹس منیب اختر،جسٹس یحییٰ آفریدی،جسٹس مظاہر علی اکبرنقوی،جسٹس جمال خان مندوخیل،جسٹس محمد علی مظہر اور جسٹس اطہر من اللہ شامل ہیں۔
اعلامیے کے مطابق سپریم کورٹ کا از خود نوٹس تین سوالات پر لیا گیا۔انتخابات کی تاریخ دینا کس کا اختیار ہے؟انتخابات کرانے کی آئینی ذمہ داری کس نے اور کب پوری کرنی ہے؟فیڈریشن اور صوبوں کی آئینی ذمہ داری کیا ہے؟۔سپریم کورٹ کی جانب سے جاری اعلامیے میں یہ بھی کہا گیا پنجاب اور خیبرپختونخوا اسمبلیاں 14 اور 17 جنوری کو تحلیل ہوئیں،آرٹیکل 224 (2)کے تحت انتخابات اسمبلی کی تحلیل سے 90 روز میں ہونے چاہئیں،آئین لازم قرار دیتا ہے کہ 90 دن میں انتخابات کرائے جائیں،انتخابات کی تاریخ کیلئے اسلام آباد ہائیکورٹ بار،خیبرپختونخوا اور پنجاب اسمبلی کے سپیکرز کی درخواستیں بھی آئیں۔
