اسلام آباد(وقائع نگار خصوصی)وزیر اعظم شہباز شریف نے نوجوانوں کو بڑی خوشخبری سناتے ہوئے کہا ہے کہ نوجوان قرضے واپس کرتے ہیں اور بڑے تاجر قرضے معاف کرواتے ہیں،چاروں صوبوں میں ایک لاکھ لیپ ٹاپ تقسیم کریں گے۔
اسلام آباد میں یوتھ لون سکیم کی تقریب سے خطاب کرتے ہوئے وزیر اعظم شہبازشریف کا کہنا تھا کہ پورے پاکستان میں لیپ ٹاپ میرٹ پر تقسیم ہوں گے،سکولز اور کالجز میں ہائی پرفارمنس والے طلباء کو لیپ ٹاپ ملیں گے،چاروں صوبوں میں ایک لاکھ لیپ ٹاپ تقسیم کریں گے،یہ لیپ ٹاپ نوجوانوں کے لیے روزگار کا ذریعہ بنا ہے،میں نوجوانوں کو لیپ ٹاپ دے رہا ہوں کلاشنکوف نہیں،اس پروگرام کے تحت قرضے 2013 کا تسلسل ہے،جب سابق وزیر اعظم نواز شریف نے نوجوانوں کو اربوں روپے کے قرضے تقسیم کیے اور اس سے نوجوانوں کو بے پناہ فائدہ ہوا،اس سکیم کا آغاز پنجاب سے ہوا تھا،ہم نے کسان بھائیوں کے لیے بلا سود قرضے دیے،ہماری سابق حکومت نے نوجوانوں کو گاڑیاں مہیا کی تھیں،ان قرضوں کی سکیموں پر ریکوری ریٹ 99 فیصد رہا،جس سے ثابت ہوتا ہے کہ نوجوان اپنے قرضے واپس کرتے ہیں،نوجوان قرضے معاف نہیں کرواتے مگر بڑے تاجر معاف کرواتے ہیں۔وزیر اعظم نے کہا کہ بینکوں کے سربراہاں کا دل کی گہرائیوں سے شکریہ اداکرتا ہوں،جنہوں نے اس پروگرام کو کامیاب بنایا ہے،اس پروگرام کی کامیابی پوری قوم کی کامیابی ہے،امید ہے کہ نوجوان ان قرضوں کو ضائع نہیں کریں گے،ہم اپنی نوجوان نسل کو مایوس نہیں کریں گے،ان کے لیے مواقع پیداکریں گے،پاکستان کا مستقبل نوجوانوں کے ہاتھ میں ہے،کفایت شعاری سے امید ہے کہ 200 ارب روپے بچیں گے۔
