لاہور(سٹاف رپورٹر)پاکستان تحریک انصاف (پی ٹی آئی) کے چیئرمین عمران خان نے سابق وزیراعلیٰ پنجاب چوہدری پرویز الٰہی کو پارٹی کا صدر بنانے کی اصل وجہ بتا تے ہوئے کہا ہے کہ مجھے جیل میں ڈالنے کی کوشش کی جا رہی ہے۔
”پاکستان ٹائم “ کے مطابق زمان پارک لاہور سے ویڈیو لنک خطاب میں عمران خان کا کہنا تھا کہ پرویز الٰہی کو اس لیے پارٹی صدر بنایا کہ انہوں نے بہت دباو برداشت کیا ہے، پرویزالٰہی اور مونس الٰہی نے دھمکیوں کے باوجود ہمارا ساتھ دیا،پرویز الٰہی اور ان کے بیٹے مونس الٰہی کو داد دیتا ہوں، مونس الٰہی کے ساتھی کو اٹھا کر لے گئے، تین دن غائب رکھا، اعتماد کے ووٹ کے وقت ہمارے لوگوں کو کہا گیا کہ عمران پر کاٹا لگا دیا، آپ ن لیگ میں جائیں، ہم نے پرویز الٰہی کو آنر کیا کہ دباو کے باوجود انہوں نے پارٹی کو ضم کیا۔عمران خان کا کہنا تھا کہ ہم نے نگران حکومت کیلئے وہ نام دیے جو قابل بھروسہ تھے، ہم نے الیکشن کمیشن کو 22 نام دیے کہ انہیں پنجاب میں نہ لگائیں، انہوں نے تقریباً تمام 22 افراد کو پنجاب میں لگایا جنہوں نے ہم پر ظلم کیا،انہوں نے پنجاب میں ہمارے مخالف کو وزیر اعلیٰ لگایا، انہوں نے الیکشن کمیشن پر پورا پریشر ڈالا ہوا ہے کہ 90 دن میں الیکشن نہ ہوں، خود کو نیوٹرلز کہنے والوں نے کہا آپ ن لیگ کی سی ایم شپ لے لیں،کبھی ایسی جانبدار نگران حکومتیں نہیں آئیں، کیا 90 دن کے بعد یہ حکومتیں بیٹھیں گی؟ ان نگران حکومتوں کا کام صرف صاف و شفاف الیکشن کروانا ہے، یہ 90 دن کے بعد کیسے ٹھہر سکتے ہیں؟ یہ عدلیہ پر اٹیک کر رہے ہیں جس کا مقصد بلیک میل کرنا ہے۔عمران خان نے کہا کہ گرفتاریاں احتجاج کرنے کا پر امن طریقہ ہے، پتہ نہیں حکمرانوں کو کیا شوق ہے، ہمارے جن لوگوں کو گرفتار کرتے ہیں، انہیں ننگا کرتے ہیں، پشاور میں بڑی تعداد میں لوگ گرفتاریاں دینے باہر نکلے ہیں، شاہ محمود قریشی کو اٹک، اسد عمر کو لیہ بھجوا دیا، کیا ایسا کرنے سے پبلک ڈر جائے گی؟۔
