گوجرانوالہ(سٹاف رپورٹر)پاکستان تحریک انصاف (پی ٹی آئی) کی” جیل بھرو تحریک “میں کپتان کے کھلاڑیوں کوگرفتار کرکے عقوبت خانوں میں پھینکنے کی دھمکیاں دینے اور عمران خان کو سبق سکھانے کا دعویٰ کرنے والے وفاقی وزیر داخلہ راناثناءاللہ خود بڑی مشکل میں پھنس گئے ،انسداد دہشت گردی عدالت گوجرانوالہ نے وفاقی وزیر داخلہ رانا ثناءاللہ کے وارنٹ گرفتاری جاری کردیے۔
”پاکستان ٹائم“ کے مطابق انسداد دہشت گردی کی عدالت نے گجرات کے تھانہ انڈسٹریل میں رانا ثنا اللہ کے خلاف درج ایک مقدمے میں وفاقی وزیر داخلہ کے قابل ضمانت وارنٹ گرفتاری جاری کیے اور پولیس کو انہیں 7 مارچ کو گرفتار کرکے پیش کرنے کا حکم دیا۔اس حوالے سے گجرات پولیس نے اخراج مقدمہ کی رپورٹ عدالت میں جمع کروائی تھی تاہم عدالت نے پولیس کی رپورٹ خارج کرتے ہوئے ملزم کے وارنٹ گرفتاری جاری کرتے ہوئے تفتیشی افسر، متعلقہ ڈی ایس پی اور ایس پی انویسٹی گیشن کو شوکاز نوٹس جاری کرتے ہوئے 7 مارچ کو ذاتی حیثیت میں پیش ہونے کا بھی حکم دیا ہے۔یاد رہے کہ وفاقی وزیر داخلہ کے خلاف دہشت گردی دفعات کے تحت 5 اگست 2022 کو گجرات کے تھانہ انڈسٹریل میں (ق) لیگ کے مقامی رہنما شاہ کاز اسلم کی مدعیت میں مقدمہ درج کیا گیا تھا۔مقدمے میں رانا ثناءاللہ پر چیف سیکرٹری اور ان کے اہلخانہ کو دھمکیاں دینے کا الزام ہے۔
