کراچی (سپورٹس رپورٹر) پی ایس ایل میچز لاہور، راولپنڈی سے کراچی منتقلی کے حوالے سے آج مشاورت ہوگی۔ اس حوالے سے پی سی بی حکام کی پیٹرن وزیر اعظم شہباز شریف سے بھی آج مشاورت متوقع ہے، جس کے بعد کوئی باقاعدہ اعلان آج سامنے آسکتاہے۔ متبادل پلان کے تحت لاہور میں اتوار اور پیر کو میچز تو پروگرام کےمطابق قذافی اسٹیڈیم میں ہی ہوں گے۔ اتوار کو لاہور قلندرز اور پشاور زلمی کے درمیان شام سات بجے میچ شیڈول ہے۔ اس میچ کی تیاریوں کو حتمی شکل دینے کے لیے آج دونوں ٹیمیں شام کو پریکٹس کریں گے، اگلے روز ستائیس فروری کو لاہور قلندرز اور اسلام آباد یونائیٹیڈ مدمقابل ہوں گی۔ مجموعی طورپر لاہور میں نو اور پنڈی میں پی ایس ایل کے گیارہ میچز طے ہیں۔ ذرائع کے مطابق باہمی مفاہمت کی صورت میں قذافی اسٹیڈیم اور پنڈی ہی تمام میچز کی میزبانی کرے گا۔
