لاہور(وقائع نگارخصوصی)وفاقی تحقیقاتی ایجنسی(ایف آئی اے)لاہور نے عمران خان کی اہلیہ اور سابق خاتون اول بشریٰ بی بی کی قریبی دوست فرح شہزادی(المعروف فرح گوگی) کے خلاف مقدمہ درج کر لیا ہے۔
”پاکستان ٹائم “ کے مطابق ایف آئی اے نے اینٹی کرپشن پنجاب کی طرف سے اربوں روپے کی کرپشن پر بھیجی گئی درخواست پر فرح گوگی کے خلاف منی لانڈرنگ کا مقدمہ درج کیا،جس کے متن میں کہا گیا ہے کہ فرح گوگی نے سابقہ حکومت میں آر پی اوز،کمشنرز،ڈی پی اوز اور ڈی سی وغیرہ کے تبادلوں کے عوض اربوں روپے بطور رشوت لی۔ایف آئی اے نے فرح گوگی کے خلاف کرپشن اور منی لانڈرنگ کے درج مقدمے میں الزام عائد کیا ہے کہ سابقہ دورحکومت میں فرح گوگی تبادلوں کے عوض رشوت لیتی رہی ہیں۔ایف آئی آر کے متن کے مطابق فرح گوگی نے 2021 میں فیصل آباد انڈسٹریل سٹیٹ میں غیر قانونی 10 ایکڑ اراضی اپنی کمپنی المعیز ڈیریز اینڈ فوڈز کے نام پر الاٹ کرائی۔فرح گوگی نے فیصل آباد انڈسٹریل اسٹیٹ میں 60 کروڑ روپے کی اراضی صرف 8 کروڑ میں الاٹ کرائی تھی۔اس کے علاوہ سرکاری افسران پر دباو کے ذریعے ٹھیکوں کے ٹینڈرز غیر قانونی طور پر ایوارڈ کروانے کی مد میں بھی کروڑوں روپے بطور رشوت لیے۔درج مقدمے کے مطابق فرح گوگی کے ذاتی بنک اکاونٹس میں گزشتہ دور حکومت کے پچھلے 3 سالوں میں تقریباً 84 کروڑ روپے جمع کروائے گئے جو اس کے ذریعہ آمدن سے مماثلت نہیں رکھتے ہیں،فرح گوگی کے 2019 اور 2020 میں بنک اکاونٹس میں تقریباً 41 کروڑ روپے 50 رائیڈرز کے بذریعے کیش جمع کروائے گئے۔تحقیقات کے دوران فرح گوگی کے اربوں روپے کے مزید بے نامی بینک اکاونٹس ملنے کا بھی امکان ہے،فرح گوگی کے نام پر تقریباً 52 کروڑ روپے مالیت کے اثاثے بشمول کمرشل و رہائشی پلاٹ، پلازے اور گھر بحریہ ٹاون لاہور،ڈی ایچ اے لاہور اور اسلام آباد میں بھی سامنے آئے ہیں۔واضح رہے کہ ایف آئی اے لاہور نے فرح گوگی کو منی لانڈرنگ کے الزامات کی تحقیقات کے لئے بھی طلب کر رکھا تھا۔ایف آئی اے کی جانب سے فرح گوگی کو بھیجے گئے نوٹس میں بتایا گیا تھا کہ فرح کے کئی ذاتی اکاونٹس اور کمپنی اکاونٹ میں 841 ملین ہیں، اکاونٹس میں موجود پیسوں کی تفصیلات ٹیکس ادائیگی سے مطابقت نہیں رکھتیں۔
