اسلام آباد(سٹاف رپورٹر)وفاقی تحقیقاتی ادارے (ایف آئی اے)کے ڈائریکٹر جنرل(ڈی جی )محسن حسن بٹ نے انسانی سمگلرز کے خلاف سخت کارروائی کا حکم دے دیا۔
”پاکستان ٹائم “ کے مطابق ڈی جی ایف آئی اے نے اٹلی کشتی حادثے پر نوٹس لیتے ہوئے رپورٹ طلب کرلی ہے اور انسانی سمگلرز کے خلاف سخت کارروائی کا حکم دیا ہے۔ڈی جی ایف آئی اے نے غیر قانونی بارڈر پار کرنے والوں کیخلاف کارروائی کا حکم دیتے ہوئے کہا کہ انسانی سمگلنگ جیسے جرم میں ملوث عناصر معافی کے مستحق نہیں، انسانی سمگلرز اور ان کے سہولت کار بین الاقوامی مجرم ہیں۔ڈائریکٹر جنرل ایف آئی اے نے انٹر ایجنسی ٹاسک فورس کا اجلاس بھی طلب کر لیا ہے،انٹرایجنسی ٹاسک فورس میں شامل اداروں کے ساتھ مل کر موثر حکمت عملی بنائی جائے گی۔ڈی جی ایف آئی اے نے ہدایت جاری کی ہے کہ کشتی حادثوں میں جاں بحق اور زخمی ہونے والے پاکستانیوں کے لواحقین سے رابطے تیز کئے جائیں،حادثے میں ملوث انسانی سمگلرز کیخلاف درج انکوائریز اور کیسز کی تحقیقات کو جلد مکمل کیا جائے۔
دوسری جانب ترجمان ایف آئی اے کا کہنا ہے کہ ملزمان کی گرفتاری کے لئے ایف ائی اے لاہور اور بلوچستان زون میں ٹاسک فورس بنا دی گئی ہے،ملزمان کی گرفتاری کے لئے ہر قسم کے وسائل کو بروئے کار لایا جائے گا،انسانی سمگلرز کے سہولت کاروں کے خلاف بھی سخت کارروائی کی جائے گی،کسی شخص کو بھی معصوم لوگوں کی زندگیوں سے کھیلنے کی اجازت نہیں ہے۔
