اسلام آباد(وقائع نگار خصوصی ) وزیر اعظم آزادجموں و کشمیر سردار تنویر الیاس خان اور وزیراعظم کے مشیر برائے امور کشمیر و گلگت بلتستان قمر زمان کائرہ کے درمیان اسلام آباد میں ملاقات،اس موقع پر وزیر اعظم پاکستان کے معاون خصوصی طارق محمودپاشا،سیکرٹری امور کشمیر و گلگت بلتستان،چیف سیکرٹری آزادکشمیر محمد عثمان چاچڑ ،پرنسپل سیکرٹری فیاض علی عباسی اور سیکرٹری مالیات عصمت اللہ شاہ کے علاوہ اعلیٰ افسران بھی موجود تھے ۔
”پاکستان ٹائم “ کے مطابق ملاقات میں آزادکشمیر میں جاری ترقیاتی منصوبوں اور معاشی مسائل کے حوالے سے تفصیلی بات چیت کی گئی۔ اس موقع پر مشیر امور کشمیر نے کہا کہ آزادکشمیر کا خطہ انتہائی اہمیت کا حامل ہے ، وزیر اعظم پاکستان نے آزادکشمیر کے مسائل کے حل کے حوالے سے خصوصی ہدایات جاری کررکھیں ہیں، اس کی اہمیت کا انداز ہ اس امر سے لگایا جاسکتا ہے کہ موجودہ مالیاتی سال میں تمام صوبوں کے بجٹ میں کٹ لگایا گیا لیکن آزادکشمیر کی اہمیت کو جانتے ہوئے اسکے بجٹ کو برقرار رکھا گیا۔قمر زمان کائرہ نے کہا کہ وہ تمام تر سیاسی وابستگیوں سے بالا تر ہو کر آزادکشمیر کے عوام کے مسائل کے حل کے لیے اپنا مثبت کردار جاری رکھیں گے، آزادکشمیر میں ٹیکس اصلاحات کے سلسلے میں ٹریک وٹر یس سسٹم کے نفاذ کے لیے تمام تر تکنیکی معاونت فراہم کرنے کے لیے تیار ہے تاکہ آزادکشمیر میں ٹیکس کولیکشن کے نظام کو بہتر بنایا جا سکے ۔
آزادکشمیر کے وزیراعظم سردار تنویر الیاس نے تنخواہوں میں اضافے کے امپیکٹ اور مہنگائی کے پیش نظر مختلف منصوبوں کے ریٹس بڑھانے کے حوالے سے بجٹ ایشوپر آزادکشمیر کے تحفظات سے آگاہ کیا اور مطالبہ کیا کہ اس ضمن میں حکومت پاکستان تعاون کرے۔ وزیر اعظم آزادکشمیر نے PTA اور USF میں آزادکشمیر کے شیئر کے حوالے سے تجاویز پیش کیں اور کہاکہ اس شیئر کی ادائیگی کے سلسلے میں وزار ت امور کشمیر اپنا کردار ادا کرے۔ قمر زمان کائرہ نے کہا کہ ملک میں معاشی صورتحال کے باعث PSDP فنڈز میں کمی کر دی گئی ہے لیکن اس کے باوجودد آزادکشمیر کی خصوصی اہمیت کو جانچتے ہوئے ان کی وزارت آزادکشمیر کے معاشی مسائل کے حل کے حوالے سے اپنا بھرپور کردار ادا کرے گی، مثبت نتائج حاصل کرنے کے لیے ضروری ہے کہ وزارت امور کشمیر اور آزادکشمیر حکومت میں تعاون اور رابطوں کو اورمضبوط کیا جائے۔
