لاہور(سٹاف رپورٹر)سابق وزیر اعظم اور پاکستان تحریک انصاف(پی ٹی آئی )کے سربراہ عمران خان نے کہا ہے کہ میری اسٹیبلشمنٹ سے کوئی لڑائی نہیں،ملک کی بہتری کے لیے آرمی چیف سے بات کرنے کو تیار ہوں،پنجاب کے وزیر اعلیٰ کا فیصلہ ابھی کر لیا تو قتل عام ہو سکتا ہے۔
”پاکستان ٹائم “ کے مطابق لاہور میں صحافیوں سے ملاقات میں عمران خان نے کہا کہ عام انتخابات اگر ایک ہی بار میں ہو جائیں تو پیسے کی بچت ہوگی،ہم پاکستان ڈیموکریٹک موومنٹ( پی ڈی ایم) کے امپائرز کے باوجود الیکشن جیتیں گے، پورا زور لگایا گیا کہ سابق وزیر اعلیٰ پنجاب پرویز الٰہی میرا ساتھ چھوڑ دیں لیکن انھوں نے ہمارا ساتھ دیا اب ہم نے پرویز الٰہی کے ساتھ وفاداری دکھانی ہے،پنجاب کے وزیر اعلیٰ کا فیصلہ ابھی کر لیا تو قتل عام ہو سکتا ہے۔
چیئرمین تحریک انصاف عمران خان کا کہنا تھا کہ فوج کا مضبوط ہونا بہت ضروری ہے،ملک کی بہتری کے لیے آرمی چیف سے بات کرنے کو تیار ہوں،میری اسٹیبلشمنٹ سے کوئی لڑائی نہیں لیکن اگر کوئی بات کرنے کو تیار نہیں تو میں کیا کرسکتا ہوں؟ہماری اسٹیبلشمنٹ کو سمجھ نہیں ہے کہ سیاست کیا ہوتی ہے؟ایسے لگتا ہے آرمی چیف ہی مجھے اپنا دشمن سمجھ رہے ہیں۔عمران خان نے چیلنج کرتے ہوئے کہا کہ مجھ پر اور اہلیہ پر ایک کرپشن کا کیس ثابت کر دیں تو مان جاوں،آرمی چیف ہی میرے خلاف کوئی کرپشن کا کیس نکال لیں،جنہوں نے میری حفاظت کرنی ہے مجھے ان سے ہی خطرہ ہے،جان کے خطرے سے متعلق میری ریکارڈ شدہ ویڈیو موجود ہے،یہ ویڈیو بیرون ملک موجود ہے۔عمران خان نے کہا خبر آئی تھی کہ مجھے ہوائی اڈے سے گرفتار کر کے بلوچستان لے جانا چاہتے تھے،اسلام آباد ہوائی جہاز سے نہ جانے کا فیصلہ رات 12 بجے کیا لیکن ہم جیل میں ڈالنے سے نہیں ڈرتے،جیل جانے سے پارٹی کا گراف اوپر جاتا اور زیادہ ووٹ پڑتے ہیں۔
