حافظ حمد اللہ کا عمران خان پر طنز،ایسی بات کہہ دی کہ پی ٹی آئی کے کھلاڑی طیش میں آجائیں

اسلام آباد(سٹاف رپورٹر)جمعیت علماءاسلام(ف)کے مرکزی رہنما اور حکومتی اتحاد پاکستان ڈیموکریٹک موومنٹ (پی ڈی ایم) کے ترجمان حافظ حمد اللہ کا پاکستان تحریک انصاف کے چئیرمین عمران خان کی ممکنہ گرفتاری پر طنز بھرا ردعمل سامنے آگیا ہے۔
”پاکستان ٹائم “ کے مطابق حافظ حمد اللہ کا کہنا تھا کہ جیل بھرو تحریک کے روح رواں اور امریکا کو للکار نے والے مردِ مجاہد عدالت میں حاضر ہوں، اگر دامن صاف ہے، گھڑی چور نہیں کی تو خود کو قانون کے حوالے کرو، گرفتاری سے بچنے کے لیے خواتین اور کارکنوں کو عمران خان نے ڈھال بنایا ہے، قانون پر عمل داری کا بھاشن دینے والا قانون سے بھاگ رہا ہے۔انہوں نے کہا کہ زمان پارک بنکر میں چھپنے سے تم نیلسن منڈیلا نہیں، بزدل اور ڈرپوک لیڈر ثابت ہوئے، اگر یہ بدمعاشی اور غنڈہ گردی عام آدمی کرتا تو ان کو گھسیٹ گھسیٹ کے گرفتار کیا جاتا۔حافظ حمد اللہ نے سوال کیا کہ عمران خان کہاں ہے آپ کا ایک پاکستان اور ایک قانون کا دعویٰ؟ آپ کا یہ کردار قانون سے کھلی بغاوت اور فساد ہے، تم قانون سے بالاتر نہیں، پی ٹی آئی کے ٹائیگر کس بنیاد پر کہتے ہیں کہ خان بہادر ہیں؟ آج انقلابی خان نے بزدلی کی ایک مثالی تاریخ رقم کی ہے۔واضح رہے کہ توشہ خانہ کیس میں عمران خان کی گرفتاری کے لئے اسلام آباد پولیس عمران خان کی گرفتاری کیلئے زمان پارک لاہور پہنچی تھی۔ایس پی کی سربراہ میں آنے والی اسلام آباد پولیس کی ٹیم عمران خان کو گرفتار کئے بغیر ہی واپس روانہ ہوگئی۔پی ٹی آئی کارکنوں کی بڑی تعداد اور حالات دیکھنے کے بعد پولیس کا ”یوٹرن “لیتے ہوئے کہنا تھا کہ وہ عمران خان کو گرفتار کرنے نہیں بلکہ عدالتی نوٹس کی تعمیل کرانے زمان پارک پہنچی ہے ۔