لاہور(وقائع نگار)وفاقی دارالحکومت کی پولیس نے پاکستان تحریک انصاف(پی ٹی آئی)رہنما اور سابق وفاقی وزیر سینیٹر شبلی فراز کے خلاف عمران خان کی گرفتاری کے موقع پر غلط بیانی کے الزام میں کارروائی کا اعلان کیا ہے جبکہ دوسری طرف سینیٹر شبلی فراز کا کہنا ہے کہ میں نے وارنٹ گرفتاری کے نوٹس پر جو لکھا اس پر قائم ہوں، اگر کسی کو انگریزی سمجھ آتی ہے تو واضح ہے کہ میں نے کیا لکھا ہے۔
”پاکستان ٹائم “ کے مطابق ترجمان اسلام آباد پولیس کا کہنا ہے کہ پی ٹی آئی رہنماو¿ں نے کہا عمران خان رہائش پر موجود نہیں، قانونی کاروائی کی راہ میں غلط بیانی سے کام لینے پر شبلی فراز کے خلاف کارروائی کی جائے گی۔پولیس کا کہنا ہے کہ پی ٹی آئی رہنماو¿ں نے یقینی دہانی کرائی کہ وہ قانون پر عمل کریں گے اس لئے ہم امید کرتے ہیں کہ وہ عدالت پیش ہوں گے۔ ہم امن و امان کو برقرار رکھنے کی ہرممکن کوشش کریں گے اور ملزم عمران خان کو سات مارچ کی پیشی کے لئے عدالت کے حکم پر عمل درآمد کریں گے۔دوسری طرف اسلام آباد پولیس کی جانب سے عمران خان کی زمان پارک رہائش گاہ میں موجودگی پر غلط بیانی کے الزام پر زمان پارک میں میڈیا سے گفتگو کرتے ہوئے شبلی فراز نے کہا کہ میں نے کہاں لکھا ہے عمران خان زمان پارک والے گھر میں نہیں ہیں؟ اگر میرے لکھنے سے کوئی جرم سرزد ہوا ہے تو جو کارروائی کرنی ہے کر لیں۔یاد رہے کہ شبلی فراز نے نوٹس کی موصولی پر دستخط کرتے ہوئے لکھا تھا کہ چئیرمین عمران خان دستیاب نہیں، تاہم، ہم تمام قانونی عمل کی تعمیل کریں گے۔
