کراچی(سٹاف رپورٹر)کراچی میں بلدیاتی انتخابات کے بعد 11 یوسیز کے نتائج نہ آنے پر جماعت اسلامی نے الیکشن کمیشن سندھ کے آفس کے باہر دھرنے کا اعلان کرتے ہوئے کہا ہے کہ پیپلز پارٹی کا اپنا میئر کراچی لانے کا خواب کبھی پورا نہیں ہوگا،
”پاکستان ٹائم “کے مطابق امیر جماعت اسلامی کراچی حافظ نعیم الرحمان نے کہا کہ پیپلزپارٹی سیاسی دہشت گردی کر سکتی ہے لیکن کراچی سے نہیں جیت سکتی،جماعت اسلامی متحدہ قومی موومنٹ( ایم کیو ایم)پاکستان کی طرح بکے گی نہیں بلکہ اپنے ایک ایک ووٹ کا تحفظ کرے گی، 11 یوسیز کے فیصلے تک دھرنے سے نہیں اٹھیں گے،جماعت اسلامی کی قوت کو ہلکا نہ لیں،ہم پورے ملک میں احتجاج کی صلاحیت رکھتے ہیں،پیپلز پارٹی کا کراچی میں اپنا میئر لانے کا خواب خواب ہی رہے گا۔
حافظ نعیم الرحمان نے کہا کہ دھرنے کو مرکز بنا کر پورے شہر میں مہم چلائیں گے،بلدیاتی الیکشن کے نتائج الیکشن کمیشن کو اپنے پاس رکھنا چاہیے تھے،ڈیڑھ ماہ تک نتائج پریز ائیڈنگ افسران کے پاس ہونے سے آر اوز کو کھیلنے کا موقع مل گیا۔انہوں نے کہا کہ پاکستان تحریک انصاف( پی ٹی آئی) نے پیپلز پارٹی کا کھیل کھیلا ہے،پیپلزپارٹی تیسرے نمبر پر تھی، پہلے نمبر پر آنے کی کوشش کی،حلقہ بندیوں پر تحفظات ہیں،جعل سازی کرکے جماعت اسلامی کے نمبر کم کر دیئے گئے،یہ نمبر تبدیل کرسکتے ہیں،تاخیر کرسکتے ہیں مگر کراچی پیپلز پارٹی کا نہیں،پیپلز پارٹی کو بھی بتایا کہ وہ کراچی نہیں جیت سکتی،کراچی کے عوام سمجھتے تھے کہ اب کراچی کے حالات بہتر ہوں گے،خود کو عوام کا چمپئین کہنے والے اپنی جماعت میں جمہوری نہیں،بلدیاتی الیکشن کروانے کے پیچھے صرف جماعت اسلامی تھی،اس وقت الیکشن کمیشن پیپلز پارٹی کی بی ٹیم بنا ہوا ہے۔
