لاہور(کورٹ رپورٹر)احتساب عدالت نے مسلم لیگ ن سے تعلق رکھنے والے معروف بیورو کریٹ فواد حسن فواد کو آمدن سے زائد اثاثوں سے متعلق کیس میں بری کرتے ہوئے تحریری فیصلہ جاری کر دیا۔
”پاکستان ٹائم “ کے مطابق احتساب عدالت کی جانب سے جاری تحریری فیصلے میں کہا گیا کہ استغاثہ فواد حسن فواد کے خلاف جرم ثابت کرنے میں بری طرح ناکام رہا،لہٰذا عدالت فواد حسن فواد،وقار حسین،رباب حسین اور انجم حسین کو باعزت بری کرتی ہے۔فیصلے کے مطابق استغاثہ کے 19 گواہ فواد حسن فواد کے خلاف آمدن سے زائد اثاثوں سے متعلق شہادت نہیں دے سکے،قومی احتساب بیورو(نیب) ایسی کوئی شہادت نہیں دے سکا جس سے فواد حسن فواد اور ان کے خاندان پر کرپشن کے ذریعے اثاثے بنانے کا الزام ثابت ہو۔فیصلے کے مطابق قومی احتساب کے قانون کے تحت سرکاری فنڈز کا عنصر شامل کیے بغیر کرپشن ثابت نہیں ہوتی۔عدالتی فیصلے میں کہا گیا ہے کہ اس کیس میں تمام ٹرانزیکشن نجی نوعیت کی ہیں جس میں سرکاری فنڈز شامل نہیں،ایسی کوئی شہادت میسر نہیں جس سے فواد حسن فواد کا کرپشن کے ذریعے آمدن سے زائد اثاثے بنانے کا تعلق ثابت ہو،وہ اثاثے جنہیں بے نامی کہا گیا،ان کا فواد حسن فواد سے کوئی تعلق نہیں۔فیصلے میں کہا گیا ہے کہ ریکارڈ میں ایسا کچھ نہیں کہ فواد حسن فواد نے اثاثے کرپشن یا غلط طریقے سے بنائے،اس کیس کی تفتیش ٹھیک نہیں کی گئی۔
