گوجرانوالہ(سٹاف رپورٹر) انسداد دہشتگردی کی خصوصی عدالت نے وزیر داخلہ اور پاکستان مسلم لیگ (ن)کے سینئر رہنما رانا ثنا اللہ کے ناقابل ضمانت وارنٹ گرفتاری جاری کردیے ہیں۔
”پاکستان ٹائم “کے مطابق گوجرانوالہ میں انسداد دہشتگردی کی خصوصی عدالت نے رانا ثنا کیخلاف تھانہ انڈسٹری ایریا گجرات کے مقدمے کی سماعت کی، وفاقی وزیر داخلہ رانا ثنا اللہ پیش نہ ہوئے، ان کے وکلا نے حاضری کی معافی کی درخواست دائر کرتے ہوئے کہا کہ حکومتی امور کی وجہ سے رانا ثنا اللہ آج عدالت پیش نہیں ہو سکیں گے، آئندہ پیشی پر حاضری یقینی بنائیں گے۔
ایس ایچ او اور ڈی ایس پی میں پیش ہوئے اور فاضل عدالت کو وارنٹ کی عدم تعمیل سے آگاہ کیا، انسداد دہشت گردی عدالت نے کیس کا فیصلہ سناتے ہوئے رانا ثناءاللہ کے ناقابل ضمانت وارنٹ گرفتاری جاری کردیے اور ڈی پی او گجرات کو رانا ثناءاللہ کو 28مارچ کو گرفتار کر کے پیش کرنے کا حکم دیا۔
عدالت نے کہا کہ ملزم کے وکلاءکا پیش ہونابتاتاہے کہ راناثناءاللہ کوآج کے کیس کا علم تھا ، پولیس نے عدالت کوبتایاانہوں نے راناثناءاللہ کوفیصل آباد،اسلام آباد تلاش کیا مگر وہ نہ ملے۔
گزشتہ سال اگست میں رانا ثنااللہ کے خلاف گجرات میں عدلیہ کو دھمکانے کا مقدمہ درج کیا گیا تھا، اس وقت کے صوبائی وزیر داخلہ کرنل (ر) ہاشم ڈوگر نے بتایا تھا گجرات کے تھانہ انڈسٹریل ایریا میں وفاقی وزیر داخلہ رانا ثنا اللہ کے خلاف معزز عدلیہ اور سرکاری افسران کو ڈرانے دھمکانے کے خلاف پولیس نے دہشت گردی کی ایف آئی آر درج کی تھی۔
