دبئی(مانیٹرنگ ڈیسک)متحدہ عرب امارات(یو اے ای )کا دبئی کا فیملی ویزہ حاصل کرنے کے خواہشمند افراد کے لئے بڑی خوشخبری سامنے آگئی ،متحدہ عرب امارات کی وفاقی اتھارٹی نے فیملی ویزے کا اجراءشروع کر دیا ہے۔
غیر ملکی میڈیا کے مطابق یو اے ای کی حکومت نے عرب امارات کا فیملی ویزہ حاصل کرنے کے خواہشمند افراد کے لئے ویزے کا اجراءشروع کردیا ہے ،وہ خاندان جن کے بچوں کی عمر اٹھارہ سال سے کم ہے وہ بھی پانچ سالہ فیملی ویزا حاصل کر سکیں گے۔اتھارٹی کے مطابق تمام قومیتوں سے تعلق رکھنے والے افراد کو ایک سے زیادہ بار داخلے کا ویزا بغیر کسی سپانسر کے جاری کیا جاتا ہے۔اس سے فائدہ اٹھانے والے کو یو اے ای میں ایک مرتبہ داخلے کے بعد لگاتار 90 روز تک قیام کرنے کی اجازت دی جاتی ہے اور اس مدت کو مزید بڑھایا بھی جا سکتا ہے۔توسیع کے ساتھ قیام کی مدت ایک سال میں لگاتار 180 دنوں سے زیادہ نہیں ہونی چاہیے۔اس کے علاوہ ویزا ہولڈر کو پرمٹ کے اجراءکے 60 دنوں کے اندر متحدہ عرب امارات میں داخل ہونا ضروری ہے تاکہ اس کی منسوخی سے بچا جا سکے۔پانچ سالہ فیملی ٹورسٹ ویزا کے لیے ویب سائٹ اور سمارٹ ایپلیکیشن کے ذریعے درخواست دی جاسکتی ہے۔ویزے کی درخواست دینے اور ضروری کاغذات کو پورا کرنے کے بعد ای میل کے ذریعے ویزا الیکٹرانک طور پر حاصل کیا جا سکے گا۔ واضح رہے کہ سیاح کے لیے بشمول ہیلتھ انشورنس ویزا کی قیمت 3 ہزار 25 درہم ہے اور درخواست دینے کی فیس 750 درہم رکھی گئی ہے۔اس کے علاوہ ویزے کے لئے اپلائی کرنے والے کی بینک سٹیٹ منٹس بھی ضروری ہے، اگر کوئی شخص ملک کے اندر رہنے کے لیے مخصوص مدت کی خلاف ورزی کرتا ہے تواس کا ویزا منسوخ تصور کیا جاتا ہے۔
