لاہور(خصوصی رپورٹ)پاکستانی گھروں کے کچن میں دورِ قدیم سے شامل کڑی پتہ کھانوں کے ذائقے اور خوشبو میں اضافے کے لئے استعمال ہوتا ہے،تاہم اب اس کے ایسے حیران کن فوائد سامنے آئے ہیں جنہیں جان کر پاکستانی خواتین کی خوشی کا کوئی ٹھکانہ نہیں رہے گا ۔
”پاکستان ٹائم “ کے مطابق کڑی پتہ کا استعمال ہر گھر کے باورچی خانے میں کیا جاتا ہے ۔اس کے استعمال سے صحت اور خوبصورتی پر بے شمار فوائد حاصل ہوتے ہیں جنہیں جاننا اور اسے استعمال میں لانا نہایت ضروری ہے۔مارکیٹ میں سستے داموں میں مل جانے والا کڑی پتہ سلاد، دالوں میں بگھار،ہری چٹنی،نیم گرم پانی میں ڈال کر مختلف کھانوں میں پکا کر کے استعمال میں لایا جا سکتا ہے۔شوگر کے مریضوں کو اکثر کڑی پتہ چبانے کا مشورہ دیا جاتا ہے اس کی وجہ یہ ہے کہ اس میں ہاپﺅ گلیسیمک خصوصیات پائی جاتی ہیں جو شوگر لیول کو کنٹرول کرنے میں مددگار ہوتی ہے۔کڑی پتوں کو روزانہ خالی پیٹ چبانے کا مشورہ دیا جاتا ہے جس سے قبض، تیزابیت، اپھارہ سمیت پیٹ کے تمام مسائل سے نجات مل جاتی ہے۔کڑی پتے کھانے سے رات کے اندھے پن یا آنکھوں سے متعلق کئی دیگر امراض کا خطرہ ٹل جاتا ہے کیونکہ اس میں وٹامن اے پایا جاتا ہے جو بینائی بڑھانے میں مددگار ثابت ہوتا ہے۔معمولی سے نظر آنے والے ان پتوں میں اینٹی فنگل اور اینٹی بائیوٹک خصوصیات پائی جاتی ہیں جو کہ متعدد قسم کے انفیکشن کو روکنے میں معاون ثابت ہوتی ہے۔کڑی پتے چبانے سے پیٹ کی چربی کم کرنے میں مدد ملتی ہے کیونکہ اس میں ایتھائل ایسیٹیٹ، ڈائی کلورو میتھین جیسے غذائی اجزا موجود ہوتے ہیں۔
