لاہور(وقائع نگار) پاکستان مسلم لیگ ن کی چیف آرگنائزر مریم نواز شریف کی ممکنہ طور پر اپنی پارٹی کے سینئر رہنما پرویز رشید کے ساتھ گفتگو کرتے ہوئے مبینہ آڈیو لیک ہوگئی جس میں ن لیگی نائب صدر کی جانب سے کہا گیا کہ پاکستان تحریکِ انصاف کے کارکن کی وفات کو حادثہ ظاہر کرنا ہے۔
”پاکستان ٹائم “ کے مطابق مائیکرو بلاگنگ ویب سائٹ اور دیگر سوشل میڈیا پلیٹ فارمز پر بڑی تیزی کے ساتھ مریم نواز شریف کی مبینہ آڈیو وائرل ہو رہی ہے جس میں ن لیگی نائب صدر مریم نواز پرویز رشید سے گفتگو کرتے ہوئے کہہ رہی ہیں کہ یہ جو ڈیتھ ہوئی ہے پی ٹی آئی ورکر کی،اس پر کہنا چاہئے نا کہ افسوس تو مجھے بہت ہے مگر کسی حادثے میں ان کی ڈیتھ ہوئی ہے،میں نے یہ بھی سنا ہے کہ پی ٹی آئی کے لوگ ان کو ذاتی کار میں لائے تھے اور چھوڑ کر بھاگ گئے۔نہیں نہیں انکل،وہ اینگل نہیں ہے۔اینگل یہ ہے کہ وہ سارے اپنے کارکنان کو چھوڑ کر خود چھپے ہوئے ہیں۔واضح رہے کہ لیک کی گئی آڈیو میں مریم نواز مخاطب شخص کو انکل کہتی ہیں تاہم یہ واضح نہیں ہوسکا کہ انکل سے کون سا شخص مراد ہے۔تجزیہ کاروں کاکہنا ہے کہ مریم نواز تمام مسلم لیگ (ن) کے رہنماوں میں سے پرویز رشید کو ہی انکل کہہ کر پکارتی ہیں۔
یاد رہے کہ اس سے قبل نگراں وزیر اعلیٰ پنجاب محسن نقوی اور آئی جی نے پریس کانفرنس کے دوران کہا کہ پی ٹی آئی کارکن پر تشدد نہیں ہوا بلکہ وہ ان کی موت حادثے کا نتیجہ تھی تاہم وہ جواب دینے سے قاصر رہے کہ اگر موت کی وجہ حادثہ تھی تو عمران خان کے خلاف قتل کا مقدمہ کیوں درج کیا گیا؟۔
