راولپنڈی(وقائع نگار) پاکستان عوامی مسلم لیگ کے سربراہ اور سابق وفاقی وزیر داخلہ شیخ رشید احمد نے دعویٰ کرتے ہوئے کہا ہے کہ حکومتی اتحادپاکستان ڈیموکریٹک موومنٹ( پی ڈی ایم)ٹوٹ چکا،ہر ایک نے انگوٹھا رکھ کر اپنا حصہ لے لیا ہے،فضل الرحمان نے ہاوسنگ،مذہبی امور اور مواصلات دبوچ لیں،چینی صدر شی جن پنگ کا تیسری بارانتخاب اور سعودی عرب ایران کے سفارتی تعلقات بحال انتہائی خوش آئند ہیں
”پاکستان ٹائم “ کے مطابق مائیکرو بلاگنگ ویب سائٹ پر ٹویٹ کرتے ہوئے شیخ رشید احمد کا کہنا تھا کہ ملک اقتصادی انتظامی اور سماجی بحران میں آگیا ہے،آئینی اور قانونی بحران شدید ترین ہوتا جا رہا ہے،سپریم کورٹ آخری امید ہے، آئین قانون اور اپنی عزت کو بچائے بالآخر یا غریب مرے گا یا سڑکوں پر آئے گا۔سابق وزیر داخلہ نے کہا کہ خیبر پختونخوا میں مولانا فضل الرحمان کے سمدھی کی حکومت ہے،ہم قطر اور یو این میں سکیورٹی دے سکتے ہیں،اپنے ملک کے الیکشن میں نہیں،الیکشن کمیشن اپنا بوجھ شہبازشریف کے گلے میں ڈال رہا ہے،ملک کی آئینی و قانونی بقاء 90 دن میں انتخاب کروانے میں ہے ورنہ ہیجان اور غیر یقینی ہے،آئی ایم ایف کا فیصلہ آنے تک بجلی 14.24 تک فی یونٹ مہنگی ہو جائے گی،علی بلال کا پوسٹ مارٹم رپورٹ کے باوجود کیس رجسٹر ہوا نہ ہی خیبر پختونخوا سے الیکشن کی تاریخ آئی،انتخاب سے انحراف بڑی تباہی کا پیش خیمہ ہوگا۔
