لاہور(سپیشل رپورٹر)امیر جماعت اسلامی پاکستان سراج الحق نے ملک کے بدترین معاشی و سیاسی حالات کا حل تجویز کرتے ہوئے کہا ہے کہ ملک میں عام انتخابات کا اعلان کیا جائے، یہی ملکی مسائل کا حل ہے، مرکز اور چاروں صوبوں میں ایک دن الیکشن کا اعلان ہونا چاہیے۔
”پاکستان ٹائم “ کے مطابق کوئٹہ میں میڈیا سے گفتگو کرتے ہوئے سراج الحق نے کہا کہ مولانا ہدایت الرحمن صرف جماعت اسلامی کا نہیں پورے علاقے کا لیڈر ہے ،اگر انہیں رہا نہ کیا گیا تو صورتِ حال کی ذمہ دار حکومت ہو گی، گوادر کے مقامی لوگوں کے مطالبات بالکل جائز ہیں، یہاں کے لوگ غیرقانونی ٹرالنگ کا خاتمہ چاہتے ہیں۔سراج الحق نے کہا کہ بلوچستان میں پارٹیاں اور چہرے بدلتے ہیں، لوگوں کی زندگیوں میں تبدیلی نہیں آتی، تمام سیاسی جماعتیں حکومت میں شامل ہیں، عوام مشکل سے دوچار ہیں،پاکستان ڈیموکریٹک موومنٹ( پی ڈی ایم) کی حکومت نے ملک کو تباہی تک پہنچایا ہے، موجودہ حالات کی ذمے دار پی ڈی ایم اور پاکستان تحریک انصاف( پی ٹی آئی) ہے، پیپلز پارٹی کراچی میں جماعت اسلامی کے مینڈیٹ کو تسلیم کرے۔
