اسلام آباد(سٹاف رپورٹر)وفاقی وزیر اطلاعات اور پاکسان مسلم لیگ ن کی مرکزی ترجمان مریم اورنگزیب نے دعویٰ کرتے ہوئے کہا ہے کہ عمران خان کی منفی سیاست دفن ہوچکی،عمران خان نے لانگ مارچ میں خود پر گولی چلوائی، توشہ خانہ سے تحفے لینا اور تحفے چوری کرنا الگ بات ہے۔
اسلام آباد میں پریس کانفرنس کرتے ہوئے مریم اورنگزیب نے کہا کہ وزیر اعظم نے غریبوں کے لئے مفت آٹا پیکج کا اعلان کیا اور صوبوں کو بھی مفت آٹے کی فراہمی کا بندوبست کرنے کی تاکید کی،چیئرمین پی ٹی آئی کی منفی سیاست دفن ہوچکی ہے،انہوں نے 4 سال میں عوام کو مہنگائی میں ڈبو دیا،عمران خان نے 2 اسمبلیاں توڑیں اور پھر لانگ مارچ کا اعلان کیا۔مریم اورنگزیب نے دعویٰ کرتے ہوئے کہا کہ عمران خان نے لانگ مارچ میں خود کو گولی لگوائی،عمران خان کے کنیٹینر سے ایک صحافی شہید ہوئی،کل ایک ننھی منی سی ریلی نکلی،عدالت بلاتی ہے تو کہتا ہے نہیں آوں گا، میں انتظار میں تھی کہ وارنٹ گرفتاری اب تک معطل کیوں نہیں ہوا؟۔انہوں نے مزید کہا کہ خیرات کے پیسے سیاست میں نہیں لگائے تو جواب دے دو،پہلی حکومت ہے جس نے توشہ خانہ کا ریکارڈ پبلک کردیا،وہ لوگ تنقید کر رہے ہیں جو کہتے تھے توشہ خانہ کا ریکارڈ پبلک کر دیا تو ملکوں سے تعلقات خراب ہوں گے۔
