اسلام آباد(وقائع نگار خصوصی)پاکستان تحریک انصاف(پی ٹی آئی) عمران خان کل ایف ایٹ کچہری کی بجائے جوڈیشل کمپلیکس جی11 پیش ہوں گے۔
نوٹیفکیشن کے مطابق چیف کمشنر آفیسر نے اپنے اختیارات استعمال کرکے کچہری سے کمرہ عدالت جوڈیشل کمپلیکس شفٹ کردیا۔کورٹ نمبر 1 جوڈیشل کمپلیکس میں عمران خان کے خلاف توشہ خانہ کیس کی سماعت ہوگی۔ عمران خان کی عدالت تبدیلی کا نوٹیفیکیشن ایڈیشنل کمشنر رانا محمد وقاص کی جانب سے جاری کیاگیا۔واضح رہے کہ اسلام آباد ہائیکورٹ نے توشہ خانہ فوجداری کارروائی کیس میں وارنٹ گرفتاری معطل کرتے ہوئے عمران خان کو کل تک گرفتار کرنے سے روک دیاہے۔اسلام آباد ہائی کورٹ نے عمران خان کی گرفتاری سے روکتے ہوئے حکم دیا کہ عمران خان کو کل عدالت پیش ہونے کا موقع دیا جائے۔ ڈسٹرکٹ ایڈمنسٹریشن اور اسلام آباد پولیس سیکورٹی مہیا کرنے کے لیے اقدامات کرے۔ چیف جسٹس نے ہدایت کی کہ عمران خان کل عدالتی اوقات کے دوران ٹرائل کورٹ میں پیش ہو جائیں۔ عمران خان یقینی بنائیں کہ ان کی عدالت پیشی پر امن و امان کی صورتحال پیدا نہ ہو۔عدالت نے فریقین کو نوٹس جاری کر کے 21 مارچ تک جواب طلب کر لیا۔قبل ازیں اسلام آباد ہائی کورٹ کے چیف جسٹس عامر فاروق نے عمران خان کے وارنٹ منسوخی کی درخواست پر سماعت کی۔ عمران خان کی جانب سے وکیل خواجہ حارث نے روسٹرم پر دلائل دئیے کہ ٹرائل کورٹ کے جج نے کہا کہ جو کچھ لاہور میں ہوا اس کی وجہ سے یقین دہانی قبول نہیں کر سکتا، میں نے ناقابلِ ضمانت وارنٹ گرفتاری منسوخ کرنے کا نہیں ،معطل کرنے کا کہا۔چیف جسٹس نے ریمارکس دئیے کہ کیا تحریری یقین دہانی اب بھی موجود ہے ؟ جس پر خواجہ حارث نے کہا جی اس وقت بھی 18 مارچ کو پیش ہونے کی یقین دہانی موجود ہے۔ چیف جسٹس نے ریمارکس دئیے کہ ہائیکورٹ نے ٹرائل کورٹ کو انڈرٹیکنگ پر خود کو مطمئن کرنے کی ہدایت کی تھی۔ چیف جسٹس نے استفسار کیا کہ ٹرائل کورٹ نے آپکی درخواست پر کیا فیصلہ دیا ہے؟ وکیل خواجہ حارث نے جواب دیا کہ ٹرائل کورٹ نے کہا کہ لاہور میں پیش آنے والی صورتحال کی بنیاد پر درخواست منظور نہیں کر سکتا،لاہور میں پیش آنے والا واقعہ افسوسناک ہے اور اس پر مقدمہ درج ہو چکا، انڈر ٹیکنگ کے ساتھ ایسے اقدامات بھی کیے جس سے پتہ چلے کہ عمران خان پیش ہونا چاہتے ہیں۔
