لاہور(شوبز ڈیسک)پاکستانی ٹی وی انڈسٹری کی معروف اداکارہ عفت عمر نے پاکستان مسلم لیگ ن کی چیف آرگنائزر مریم نواز شریف کی ”خوبصورتی“ کو ”قدرت کا تحفہ“ قرار دیتے ہوئے کہا ہے کہ مریم نواز نے اپنے چہرے کے ساتھ کچھ نہیں کرایا وہ قدرتی طور پر خوبصورت ہیں، 26 سال سے عمران خان کو پروموٹ کیا جا رہا ہے، اگر ان جیسی مارکیٹنگ کسی کی بھی کی جاتی تو وہ بھی وزیر اعظم بن سکتا تھا۔
”پاکستان ٹائم“ کے مطابق ایک انٹرویو میں اداکارہ عفت عمر کا کہنا تھا کہ میں شوبز سے ہوں اوربتا سکتی ہوں کہ کس نے کیا کرایا ہوا ہے؟ مریم نوازنے اپنے منہ پر کچھ نہیں کرایا ہوا، میں اس کی ضمانت دے سکتی ہوں، وہ ہیں خوبصورت تو سڑو پھر، اب ہم کیا کہہ سکتے ہیں۔اس موقع پر عفت عمر نے تحریک انصاف کے کارکنوں کو تنقید کا نشانہ بناتے ہوئے پنجابی زبان میں کہا کہ ” کوئی گل نی، تواڈا وی ہینڈسم اے، بڈھا ہوگیا پر ہینڈسم تے او وی سی“ (کوئی بات نہیں تمہارا والا بھی خوبرو ہے، بڈھا ہوگیا پر خوبرو تو وہ بھی ہے)۔عفت عمر نے کہا کہ میں نہ صرف مسلم لیگ ن بلکہ پیپلز پارٹی کی بھی حمایت کرتی ہوں اور میری شدید خواہش ہے کہ دونوں جماعتیں مل کر حکمرانی کریں، اگر حکومت کی اجازت دینے والی قوتیں واقعی ن لیگ اور پیپلز پارٹی کو حکومت کرنے دیں تو بہت کچھ تبدیل ہوسکتا ہے۔عفت عمر نے کہا کہ مسلم لیگ ن حالات پر قابو پانے میں ماہر اور عوام تک حکومت کے ثمرات پہنچانے میں تیز ہے، جبکہ پالیسی بنانے میں پیپلز پارٹی کا کوئی ثانی نہیں، اگر دونوں پارٹیوں کو حکومت کرنے دی جائے تو بہت کچھ تبدیل ہو سکتا ہے۔
